Ration pek leh Bru lak lêt tihtawp phûtin Bru-te'n kawngpui an dang dawn

Mizoram Bru Displaced People Forum (MBDPF) chuan, Tripura aṭanga Mizorama Bru lak let hna kal mek tihtawp phut nan leh Tripura re­fugee camp paruka sorkar laipuiin ṭanpuina a pek ṭhin, kumin October thla tìr lama a tihtawp tak chu pe chhunzawm leh tura phût nan vawiin aṭangin tiam chin awm loin Kanchanpur/Dasda leh Ananda Bazar Road inkar kawngpui an dang dawn.

MBDPF hian nimin khan North Tripura district magistrate Ravel H Kumar hnenah lehkha thehlutin, kawngpui dan an tum thu an hriattir a; Ministry of Home Affairs (MHA) thutlukna anga October 3 aṭanga November 30, 2019 chhunga Tripura aṭanga Mizoram khua leh tui Bru-te Mizorama hruai kìr hna thawh leh, Bru camp hrang hrang­a sorkar laipuiin ration a pek tihtawp chu Constitution kalh leh human right bawhchhiatna a nih thu an tarlang.

October 3, 2019 aṭanga Bru lak let thawh 9-na kalpui ṭan leh kalpui mek chu tihluihnaa tih nia sawiin MBDPF chuan, "Muanawm taka kalpui a ni lo a, tihluihnaa kalpui a ni. Bru-te himna ngaihsak a ni lo a, MBDPF, MBIDM, BDC leh BTDS ten Joint Memorandum kan thehluhte pawh ngaihsak a ni lo," an ti.

MBDPF chuan, free ration tihtawp tawh chu pe chhunzawm leh tura ngenna,  joint application pawh October 24, 2019 khan Kanchanpur SDM hnenah thlen a nih tawh thu sawiin, tun thlengin chhanna hmuh a la nih loh thu an tarlang.

MBDPF-in North Tripura District Ma­gistrate hnena lehkha an thehluha an ziah dan chuan, Bru camp hrang hranga sorkar laipuiin free ration a pek tihtawp tawh chhunzawm leh Bru lak let hna thawh mek tihtawp phût nan vawiin aṭangin Kanchanpur/Dasda leh Ananda Bazar kawngpui an dang dawn a ni. An ruahman dan chuan, kawngpui chu vawiin aṭangin ni tin zing dar 5 aṭanga tlai dar 5 thleng an dang dawn a, zan lamah erawh chuan dan an tum lo.

Kawngpui an dannaah hian, Fire department, ambulance, damlo, drinking water department, zirlai exam turte leh police-te erawh dan an tum lo a; mi dang zawng erawh chu dan an tum a ni. MBDPF-in North Tripura district magistrate Ravel H Kumar hnena nimina lehkha an theh­luhah hian MBDPF president A Sawibunga leh general secretary Bruno Msha ten hming an ziak a ni.