VC/LC inthlanah lâk vek kan tum - MNF Vice President

MNF vice president Lal­thlengliana chuan, kumina village council leh local council inthlanpui awm turah MNF party-in chak vek an tum thu a sawi. CAB/CCA chungchangah, Mizoram a huam tel loh avangin lawmthu sawi nan CAB an vote tih a sawi bawk.

MNF Aizawl East-I Block-te February 19, Nilainia Beraw­tlanga an ṭhutkhawmah La­l­thlengliana chuan thu sawiin, MLA inthlan laiin mi ṭhenkhatin maichàm aṭangin MNF chu an bei niin a sawi a, "Maichàm thiang­hlim aṭangin min bei mah se, kan CM bialah hian hnehna sang ber dawttu kan chang thei hial a, MP inthlanah erawh kan beisei a pha lo deuh. Kan hma lawka VC/LC inthlan awm turah MNF-te'n lâk fai vek kan tum a ni," a ti.

Lalthlengliana chuan, mi ngaihdan leh hmuh dan ngaihtuah reng a ṭul thu sawiin, an party mite chu ṭang zel turin a chah a, "ZPM thupuangtuin kan mal din dawn a ti a, Congress nen an thawkho leh lo ang tih a sawi theih loh," a ti a; party dang zawng zawng ṭangho mah se, MNF-in an hneh ngei tur a nih thu a sawi.

MNF Vice President chuan, CAB/CCA-in Mizoram a huam tel loh avangin lawmthu sawi nan CAB an vote nia sawiin, "Do ngai ni se, MNF hi a do huai ber tur kan ni. Pu Duhoma te angin kan dak ral ve mai mai lo ang," a ti.