MCO-in silver jubilee an lawm

Mizo Cultural Organisation (MCO) chuan nimin khan Art & Culture auditorium-ah an kum 25-na, silver jubilee an lawm a, Assembly speaker Lalrinliana Sailo-in a hmanpui.]ṭ

Lalrinliana Sailo chuan, khawvel ram eng emaw zat a tlawh tawhnaah ram dang mite'n an hnam tih dan phung leh nun zia an zahpui lohzia a hmuh ṭhin thu a sawi a, "Mizote pawh kan harh chhuak deuh deuh zel. Khawvel inlumlet zel dan tur a hriat loh a, Zo hnahthlakte kan inpumkhat hun hi a la thleng ngei dawn a, chumi atan chuan MCO-te an pawimawh em em a ni," a ti.

Mizorama chêng, Duhlian ṭawng hmangte'n Zo hnahthlakte inpui an nihna chu an rilru leh mit timengtu ni se a duh thu sawiin Speaker chuan, "Zo hnahthlak zawng zawngte kan thlazàr hnuaia an len vek theihna turin ngaih­tuahna kan sên a ngai a ni," a ti a; Zo hnahthlakte culture leh tradition-te chawi nun zel kawngah theihtawp chhuah zel turin MCO member-te a ngen.

Lalrinliana Sailo chuan, Duhlian ṭawng hmangte'n Zo hnah­thlak hnam bil ṭawng hmangte an ngai mikhual deuh hleka a hriat thu sawiin, "Hei hi kan inpumkhatna dâltu a ni thei a, hetiang rilru pute chu sim hmak turin ka chah a ni. Kan hnam incheina kan ngaihhlut a, tun aia kan chawi sàn lehzual theih chuan Zo hnah­thlakte min hûi khawmtu ṭangkai tak a ni thei," a ti.

MCO silver jubilee lawmnaah hian Art & Culture director R Hmingthanzuala pawhin thu a sawi a, chawhnu lamah kum 2020-22 chhunga office bearer tur an thlang. President atan Robert Romawia Royte, Chhinga Veng, minister of state leh general secretary atan Lalbiakhlua, Chanmari West an thlang a ni.

MCO hi February 13, 1993-ah Aizawla cultural club pasarih kal khawmin an din a; tun din­hmunah Aizawlah branch/club 66 an nei a, sub-headquarters pali leh group headquarters pakhat an nei bawk.