Bru chhungkua 218 Hruai kìr an ni tawh

Ministry of Home Affairs (MHA) thutlukna anga October 3 aṭanga November 30, 2019 chhunga Tripura aṭanga Mizoram khua leh tui Bru-te Mizorama hruai kìr hna thawh mekah, nimin thleng khan Bru chhungkua 218 Mizoramah hruai kîr an ni tawh a; chu'ngte chu Mamit, Kolasib, leh Lunglei district-a khaw hrang hrangah dah an ni.

Mamit DC Dr Lalrozama chuan Vanglaini palai zawhna chhangin, Tripura camp-a awm Bru zinga chhungkaw pasariha mi 23-te chu anmahniin an camp aṭangin Mizoram an pan a, nimin khan Kanhmuna repatriation centre-ah an inhriattir thu a sawi a, "Pathianni leh Thawhlehni (bazar ni)-ah hruai kir hna hi kan châwl a, a bakah chuan ni tin thawh zel a ni," a ti. Nimina Mizorama lak let chhungkaw pasarihte nen, Mamit district bika Bru lâk lêt tawh zat chu chhungkaw 131 an ni.

Dr Lalrozama chuan, MBDPF-in kawngpui dan tum mah se, Bru lak lêt hna chu chhunzawm zel tur a nih thu a sawi a, "Sorkar hotu lúte aṭanga thu thar a awm a nih loh chuan ruahmanna awm sa angin Bru hruai kîr hna chhunzawm zel a ni ang," a ti a; MBDPF-in kawngpui dan an tum chu Mizoram chhung a nih loh avangin Mizoram sorkar anga hmalak theih a ni lo a, a ṭul angin Tripura sorkarin hma a la tura an ngaih thu a sawi.

Kolasib district-ah chuan nimin khan chhungkaw pakhata mi pahnihte hruai kìr niin, an awmna tur thlenpui a ni a, chu'ngte nen chuan tun ṭum Bru hruai kìrnaa Kolasib district-a Bru lâk lêt tawh zat chu chhungkaw 18 (mi 73) an nih thu, district bawrhsap Zoengsanga chuan Vanglaini a hrilh.

Lunglei DC K Lalrinzuali hnen aṭanga thu dawn danin, Lunglei district-ah chuan Bru chhungkua 69-a mi 262 hruai kîr an ni tawh a, an zinga chhungkaw pakhat chu sorkar official-te'n camp aṭanga an hruai ni lo, an­mah­nia Mizoram pan an ni.

Tarlan tawh angin, Mizoram Bru Displaced People Forum (MBDPF) chuan Bru lâk lêt hna kal mek tihtawp phût nan leh Tripura-a Bru camp-a sorkar laipuiin ṭanpuina a pek ṭhin, kumin October thla tìr lama a tihtawp tak chu pe chhunzawm leh tura phût nan vawiin aṭangin tiam chin awm loin Kanchanpur/Dasda leh Ananda Bazar Road inkar kawngpui dan an tum a ni. Kawngpui dan an tum thu hi October 29 khan North Tripura district magistrate Ravel H Kumar hnenah ziakin an hriattir.

MBDPF ruahman dan chuan, kawngpui chu vawiin aṭangin ni tin zing dar 5 aṭanga tlai dar 5 thleng an dang dawn a, zan lamah erawh chuan dan an tum lo. Kawngpui an dan turah hian, Fire department, ambulance, damlo, drinking water department, zirlai exam turte leh police-te erawh dan an tum lo a; mi dang zawng erawh chu dan an tum a ni.