Lirthei intlân chhâwk zel dawn

Coordination Com­mittee on Traffic Manage­ment thutlukna anga Aizawl khawpuia lirthei intlân chhâwk kalpui mek chu kumin October thla tawp hnuah pawh kalpui chhunzawm zel tur a nih thu, Traffic SP Rodingliana Chawngthu chuan nimin khan a tarlang.

Traffic SP chuan, Ai­­zawla lirthei intlân chhâwk kalpui mek chu October 31, 2019 thleng tur a nih thu a tarlang a; inthân chhâwk chu enchhinna a ni a, Aizawl khawpuia traffic jam tihziaawm nan leh lirthei hmangtute tana ṭha zawka hriat a nih avangin November 1, Zirtawpni aṭangin thu leh awm hma chu intlân chhâwk chhunzawm zel tur a nih thu leh, thupêk zâwm lote chu MV Act, 1988 Section 179 hmanga hrem an nih tur thu a tarlang a ni.

Lirthei intlan chhâwk hian mimal lirthei (public transport tih loh zawng), sorkar motor, two wheeler zawng zawng (phalna pek bik tih loh) leh bungraw phur lirthei zawng zawng a huam a; nipuiah zing dar 9 aṭanga tlai dar 5:30 inkar leh thlasikah (November - February) zing dar 9 aṭanga tlai dar 5 inkar a huam. Inrinni, Pathianni leh sorkar chawlh ní-ahte erawh chuan intlân chhâwk kalpui a ni lo.

ThawhṬanni -     Registration 1 leh 2-a tâwp

Thawhlehni     -     Registration 3 leh 4-a tâwp

Nilaini     -     Registration 5 leh 6-a tâwp

Ningani     -     Registration 7 leh 8-a tâwp

Zirtawpni     -     Registration 9 leh 0-a tâwp