Aizawl to Lamka bus a service thei ṭêp Phuldungsei (Tripura) atan hma la mek

Transport minister TJ Lalnuntluanga chuan, Aizawl leh Churachandpur (Lamka), Manipur inkarah Mizoram State Transport (MST) bus tlântir theih a nih ṭêp tawh thu a sawi a; Aizawl to Phuldungsei (Tripura) inkarah pawh MST bus service tir tuma hmalak mek a nih thu a sawi bawk.

Vanglaini palai zawhna chhangin TJ Lalnuntluanga chuan, Aizawl-Churachandpur bus tlantir turin Mizoram sorkarin a tih tur ang a tihfel thawkhat tawh thu sawiin, "Manipur sorkar lamin official-a thil tihfel tur an la nei. An tih tur an tihfel theihna atan Manipur Chief Minister ka kâwm tawh a, ani chuan official-te chu thil ṭul angte chingfel turin a hriattir tawh a ni," a ti.

Transport Minister sawi danin, Churachandpur-ah hian pisa tur, ticket pek chhuahna tur leh driver leh handleman-te riahna atan mimal in luah tur tihfel a ni tawh a; bus dahna atan Churachandpur-a Mizoram House tura ruahman a awm tawh a ni. Manipur sorkarin tihfel ngaite an tihfel veleh MST bus tlantir ṭan nghal tum a ni.

Aizawl-Phuldungsei (Tripura) inkara MST bus tlantir turin hmalak mek a nih thu sawiin TJ Lalnuntluanga chuan, "A tirah chuan Behliangchhip thleng bus service tir tum a ni a, mahse, Phuldungsei-in an khaw thleng law law an duh avangin an khaw thleng hi service tir tum a ni. Phuldungsei khawtlang chuan hmunhma ṭul ang min pek an inhuam," a ti.

Transport Minister chuan, remchang hmasaah Tripura sorkar hotute a biak dawn thu sawiin, "Bus service tir tur hian harsatna a awm vakin kan ring lo," a ti a; MST bus tlantir ngei turin theihtawp an chhuah thu a sawi. Aizawl to Tahan, Myanmar bus tlantîr tur pawhin hmalak mek a nih thu sawiin Minister chuan, "Ram pahnih inbiak ngai a nih avangin a kawng a thui deuh. Tunah hian bus service tir tura pawimawh tak Integrated Check Post tur chei ṭhat mek a ni. Chei ṭhat a nih hnuah sorkar laipuiah bus service tir chungchang hi thlen leh a ni ang," a ti.

TJ Lalnuntluanga sawi danin, Aizawl-Tahan bus tlantirna turin Ministry of External Affairs chuan Mizoram sorkar hnena bus pathum pek a intiam tawh a ni. Hlâwkna ai mahin, Zo hnahthlakte inpumkhatna an ngaihtuah ber thu sawiin TJ Lalnuntluanga chuan, "Zofa hmun hrang hranga chengte awlsam zawka inkalpawh theih kan ngai pawimawh. Zo fate chenna kan ngaih pawimawhzia sorkar chuan lantir kan tum a ni," a ti.