KHAWTHLIR

Nimin khan Higher & Technical department conference hall-ah HIV/AIDS Sensitization Campaign Programme neih a ni a, district programme manager Dr R Zonunmawii'n Higher & Technical department-a thawkte HIV/AIDS chungchang a hrilhfiah. Campaign hi Aizawl District AIDS Prevention and Control Committee-in Aizawl khawpuia sorkar office hrang hrang­ah HIV/AIDS sensitization campaign neih a rel tawh bawhzuina a ni.

Mizo History Association (MHA)-in October 29 aṭanga Pachhunga University College (PUC) Seminar Hall-ah conference vawi 39-na an hman chu nimin khan an zo fel. MHA conference-ah hian Mizoram leh Mizoram páwn aṭangin Mizo historian-te an tel a; Mizo leh Zo hnahthlak hnam hrang hrangte history  zirhoin, thu pawimawh tak tak an sawiho a ni. MHA hi kum 1980-ah din a ni a, tuna la tel zingah Prof. Dar­chhawna, Prof. Sangkima leh Prof. JV Hluna te chu a dintute zingah an tel. 

Mizoram University (NEHU Mizoram Campus telin)-a Department of English kum 40 tlin, ruby jubilee chu nimin aṭang khan MZU Guest House Conference Hall-ah lawm ṭan a ni a, vawiinah chhunzawm a ni ang. MZU vice chancellor Prof. KRS Sambasiva Rao khuallian a ni a, Prof. KC Baral, English department bul ṭantu chu khualzahawm a ni. Mizoram University aṭanga English zir chhuak tawh leh thawk tawhte an tel. NEHU-in kum 1979-a Mizoram Campus an hawn tirah English hi department hmasa ber zinga mi a ni.

Kolasib-a IPR department conference hall-ah nimin khan khawtlang hruaitute leh kohhran ṭhalai pawl hruaitute tan ruihhlo chungchangah sensitization workshop buatsaih a ni. National Tobacco Control programme (NTCP) district nodal officer Dr C Vanlalhlimpuia'n vaihlo zûk leh hmuam ṭhat lohna a sawifiah a; medical officer Dr Lalthanzami'n ruihhlo ngawlveinain taksa a nghawng dan (substance abuse) sawiin, NTCP district consultant ZT Vawra Hmar-in COTPA Act 2003 a sawifiah thung.