District-ah Vigilance Awareness Week hmang
Nimin khan Kolasib, Serchhip, Lawngtlai leh Mamit-ahte Vigilance Awareness Week 2019 pualin hun hman a ni a; Week thupui 'Integrity - A Way of Life (Rinawmna - Nunphunga neih) tih hmangin infuih tharna hun hman a ni.
Kolasib DC Zoengsanga kaihhruaiin Kolasib-a Parish Hall-ah Vigilance Awareness Week hman a ni a, Kolasib-a sorkar hnathawkte leh college zirlai te, tlawmngai pawl hruaitute telin, thutiam an sawi rual. Zoengsanga chuan, kuttlinglo leh mahni thawhrim rah ni loa sum lak luh chu a zahawm lo a, a tlo lo tih sawiin, mipui sum hmannaah rinawmna nunpui a pawimawh thu a sawi a, "Ram leh hnam a dam nan rinawmna nunpui turin Pathian a pawimawh ber," a ti. Anti Corruption Bureau (ACB) inspector F Engkunga'n Week hman chhan a sawifiah bawk.
Serchhipah chuan DC Conference Hall-ah hman a ni a; ACB additional SP Zosangliana'n Vigilance department hnathawh dan te, ACB hnathawh dan te, Lokayukta hnathawh dan te, complaint thehluh dan te, property return chungchang leh eirukna awmze tlangpuite a sawifiah.
Lawngtlaiah chuan DC Conference Hall-ah bawrhsap Shashanka Ala kaihhruaiin hman a ni a; Bawrhsap chuan, officer kal khawmte chu dik taka hna thawk tur leh duhâmna inbâwihtir lo tura chahin, "Hna thawhna hmun leh ni tin nunah rinawmna kan nunpui chuan hlemhlêtnain min tibuai pha ngai lo ang," a ti.
He hunah hian Lawngtlaia Mizoram state sorkar leh Lai Autonomous District Council (LADC) sorkara officer-te an tel a; Anti Corruption Bureau (ACB) inspector Jerry Lalrinsanga'n ACB hna thawh dan a sawifiah a, Lawngtlai additional SP C Lalruatkima kaihhruaiin kal khawmte'n rinawmna nunpui tura thutiam an sawi rual a ni.
Mamitah chuan Siamliana Hall-ah Vigilance Awareness Week hman a ni a, Mamit DC Dr Lalrozama'n a kaihruai. Bawrhsap chuan, "Vigilance Week kan hman denchhen hian rinawmna tinung thar leh ila, nasa lehzuala eirûkna leh hlemhletna doa fihlim turin i awm ang u," tiin kalkhawmte a sáwm.
Inkhawmah hian Mamit district-a sorkar hnathawk hrang hrang, college zirlaite leh khawtlang hruaitute leh tlawmngai pawl hruaitute an tel a; ACB deputy SP R Lalnunmawia'n eirûkna leh hlemhletna do kawnga dan anga hmalak dan tur te, ACB hnathawh dan tlangpui leh Prevention of Corruption Act, 1988 chungchangte a sawifiah a ni.