Lokayukta chungchangah MNYF-in ZPM an chháng

MNF ṭhalai chuan thuchhuah siamin, ZPM general secretary Phairothanga'n October 28, 2019-a ZPM pisa inkhawmah, MNF sor­karin Lokayukta a ṭhiat anga a sawi chu a hriat chian loh vang emaw, hre reng chunga mipui hruai sual a tum vang emaw a nih an rin thu an tarlang; "Party hruaitu chuan thil awmzia hre chiang lo leh thu dik tâwk lo thehdarh tawh lo turin kan duh hle a ni," an ti.

Kum 2013-ah Lokpal Act pass a ni a, January 1, 2014 aṭanga hman ṭan tura tih leh Lokpal Act hman ṭan aṭanga kum khat chhungin state tinte chu Lokayukta din vek tura tih a ni tih sawiin MNYF chuan, "Sorkar hmasa Congress sorkar khan an tihlawhtling hman lo a, MNF sorkar thar chuan sorkarna a chan aṭanga thla hnih chhungin Lokayukta a peih hman a ni," an ti a; Lokayukta atan a tirah Law department chu nodal agency a ni a, a hnathawh hmang leh mawhphurhnate avangin nodal agency atan Vigilance department ruat a ni ta zawk niin an tarlang.

MNYF chuan, Mizoram sorkarin Lokayukta a ṭhiat lo a, mumal taka a kalna tur leh chang­tlung taka hna thawh a nih theihna turin hma a la zawk a ni tih ZPM-te'n hria se an duh tih sawiin, "Lokayukta hi sual hnu chhui leh zir chiangtu tur leh a ṭul anga Court-a thehluttu tur a nih angin, Vigilance department hi a nodal agency a ni lo thei lo a ni," an ti.