Pàwlráng khuaah awmze nei zawkin Bawlhhlawh sawngbawlna tur kalpui ṭan

Pàwlráng V/C chuan, LAD-in Pawlrang khua bawlhhlawh awmze nei zawka sawngbawl kawnga hmalakna (solid waste management) bul ṭanna tur, model village-a a puan pualin nimin khan an khuaah hun an hmang a, LAD minister K Lalrinliana'n hmanpuiin, khawtlang thil pawimawha hman atan V/C hnenah Rs. 10,000 a pe.

K Lalrinliana chuan, Pawlrang khua chu bawlhhlawh ṭawih thei leh ṭawih thei lo thliar hran leh faina kawnga an hmalakna ropui a tih thu sawiin, "Khawtlang mipuite inlungrualna leh ṭanrualna ṭhat vang a ni a, a zahawm hle. Faina hian ngaih pawimawh a hlawh a, Mizote pawh tun hmaa hnam bâl ber pawla sawi kan ni a, tunah erawh faina kawngah hma kan sawn a, India ramah hnam fai pawla chhàl ngam kan ni tawh," a ti.

Inkhawmah hian khual­zahawm, bialtu MLA L Thangmawia, Human Resources  Development Board vice chairman pawhin thu a sawi a; Pawlrang YMA hnenah no dawrzawn 10, thingpui thleng pahnih leh ketli a hlan a, MUP hnenah dekchi lian a hlan bawk.

Pawlrang khua hian December 2016 aṭangin bawlhhlawh ṭawih thei leh ṭawih thei lo an thliar hrang ṭan a, kum 2017 khan Champhai district-ah faina lama thawk ṭha ber pahnihna lawmman an dawng. Kum 2018 khan Champhai district-a ram kâng tur vèn kawnga thawk ṭha ber lawmman an dawng bawk. Kum 2019-ah Swachh Bharat Mission hnuaiah Champhai district-a hma la ṭha ber lawm­man an dawng leh a; bialtu MLA L Thangmawia chuan model village atan a thlang a ni.