Mizoramah SHG 4,784 din a ni tawh

Mizoram State Rural Livelihoods Mission (MzSRLM) hnuaiah Mizorama khaw hrang hrangah self help group (SHG) 4,784 din a ni tawh.

MzSRLM chief executive officer (CEO) Lalchhandami chuan Vanglaini palai zawhna chhangin, SHG member-te chu eizawnna ngêlnghet neihtir leh awmze neia pawisa hmantir tum a nih thu a sawi a, "Sangha pek aiin sangha man dan kan zirtir a, hausak thúr thúrna tur a ni lo a, eizawnna ngêlnghet siamsak kan tum. SHG hmanga hmalakna hian Mizoram hmun hrang hrangah nghawng a nei ṭha hle," a ti.

MzSRLM CEO sawi danin, SHG kalpui a nih aṭangin thingtlang hmun hrang hranga SHG member-te'n eizawnna kawng hrang hrangah felfai zawk leh rintlak zawka hna an thawh theih nan nasa takin hmalak a ni. Ran vulhtute'n ṭha leh hlâwk zawka ran an vulh theih nan te, thlai leh buh chîn danah pawh awmze nei zawka kalpui a nih theih nan te, bank-a sum pûk dan, file vawn dan leh ṭul dangte an thiam theihna atan hmalak a ni a; SHG member zingah an sum pûk awmze neia an hman vanga an fate zirna sang zawka kaltir thei leh eizawnna kawng dang kalpui theite an awm.

MzSRLM hnuaiah kum 2013 aṭangin Mizoramah hmalak ṭan a ni a, thingtlanga mi harsa zawkte intélkhawm chuan SHG an din ṭhin. SHG din turin member 5-15 awm a ngai a, an bul ṭanna atan start-up cost Rs. 2,500 pek ṭhin a ni. Thla thum hnuah kaihhruaina chi hrang hrang zawm tur hmangin endik an ni a, endikna an paltlang chuan 'A' grade-te'n revolving fund an dawng ṭhin.

SHG-a telte chu thla ruk an intèlkhawm hnuah village organisation (VO) an din a, VO hian SHG-te hnenah Community Investment Fund (CIF)-a mi chu eizawnna kalpuina atan pawisa an pûktir ṭhin a ni. Sorkar laipui aṭanga an sum dawn CIF hnuaiah Aajeevika Grameen Express Yojana (AGEY) kaltlangin motor lei phalsak an ni a, a pung awm loin sum pûk theih a ni. AGEY hnuaiah hian RD block 10-ah SHG-te'n maxi-cab 22 leh pick-up 26 an lei tawh a ni.