Assembly session Youtube-ah live-a Chhuah lo turin ZONET TV hriattir

ZONET Cable TV Pvt. Ltd. chu Assembly session neih mek Youtube-ah live-a pe chhuak tawh lo tura tih an nih thu nimin Assembly session-ah sawi chhuah a ni.

ZPM member VL Zaithanzama'n Information & Public Relation (IPR) minister Lalruatkima a zawhna kal zelah Congress Legislature Party (CLP) leader Zodintluanga chuan, ZONET Cable TV chu Youtube-a Assembly session live tawh lo turin IPR Director-in ṭawngkaa a hriattir thu a sawi chhuak a ni.

Zodintluanga chuan, Assembly session chu a hmuna kal ve thei lote'n an en ve theihna atan Assembly Secretariat leh IPR ṭangkawpin live-a an pe chhuak chu lawmawm a tih thu a sawi a, "Hei bakah hian live-a pek chhuahin a cover phak lote'n internet aṭanga an en theihna atan ZONET chuan Youtube-ah a pe chhuak tel a ni," a ti.

Assembly session Youtube-a live-a pek chhuah chu live laia en hman lo tan pawh a hnuah a en leh theih avangin a ṭangkai thu sawiin Zodintluanga chuan, a zau thei ang bera Assembly proceeding-te Mizo mipui hmun hrang hranga awmte'n an hmuh ve theihna atan hma a lak theih leh theih loh IPR Minister a zawt a ni.

IPR minister Lalruatkima chuan, Assembly session live chu IPR property a nih loh thu sawiin, "Legislative Assembly property a ni. A ngai ngaia dah hi lehlamah chuan correction ngaite a awm thei a, a ṭha lo thei. Legislative Assembly lamin rem an tih chuan keini lamah chuan harsatna a awm lo," a ti.

IPR Director-in Youtube-ah tichhuak lo tura a hriattir avangin ZONET Cable TV chuan nimina Assembly session chu chawhma lam zawng Youtube-ah live-in an tichhuak lo a; ZONET aiawhte'n Assembly speaker Lalrinliana Sailo an hmuh hnuah chawhnu lam aṭangin Youtube-a ZONET channel-ah live-a tihchhuah chhunzawm leh a ni.