Mi 200 aia tam inkhawm theih dawn Biak-ina leng zat zatve tel phal a ni
Mizoram sorkar chuan February 2021 aṭanga biak-ina inkhawm ṭan theih tura a tihah January 16, 2021-a inkaihhruaina a siam tawh chu a tidanglam a; mi 200 aia tam lo tih chu paih niin, biak-in ṭhutnaa ṭhu thei zat aṭanga 50% aia tam lo inkhawm theih a ni dawn.
Disaster Management & Rehabilitation secretary Lalbiaksangi'n nimina hriattirna a tihchhuahah chuan, "Ṭum khatah mihring leng zat 50% aia tam punkhawm loh tur a ni a. Zan lama inkhawm erawh khap rih a ni. Sunday school chu páwla inṭhen loin pulpit aṭangin emaw khaikhawm tur a ni a; inkhawm zawng zawngin mask vuah ṭheuh tur a nih bakah, inkhawm chhungin zai loh tur a ni," tih a ni.
DMR Secretary-in hriattirna a chhuahah chuan, mipui punkhawmna hmunah Covid-19 inkài darh a nih loh nan invênna atana inkaihhruaina (SOP) siam (Attachment-III) chu ṭha taka zawm tur a nih thu te, kohhran mite himna tura SOP duante chu ṭha taka zawm a nih theih nan kohhran tinin 'SOP Implementation Committee' an ruat dawn thute tarlan a ni bawk.
Mizoram Synod hruaitute - moderator Rev. Dr C Lalhlira, senior executive secretary Rev. Lianhmingthanga Sailo leh secretary Upa Lalrinmuana te chuan tun hnai khan chief minister Zoramthanga chu a chenna banglaah an hmu a, inkhawm thei zat chungchang an sawipui.
Vanglaini palai zawhna chhángin Synod Moderator chuan, Chief Minister an hmuhnaah chuan, inkhawm thei zata mi 200 aia tam lo tih chu tihdanglam an rawt a, an awm lai vêkin CM Zoramthanga chuan chief secretary Lalnunmawia Chuaungo, State Disaster Management Authority hnuaia State Executive Committee chairman ni bawk a be nghal tih a sawi a ni.