Sorkar hnathawk hlawh pek turah Group C leh D pe hmasa dawn

Mizoram sorkar chuan a hnathawkte January 2021 thla hlawh chu group C leh D-te a pe hmasa dawn a, group A leh B-te pawh a rang thei anga pek a tum.

Vanglaini palai zawhna chhangin Finance department hotute chuan, vawi leh khata sum chhuak tam lutuk tur vên nan group C leh D-te hlawh pek hmasak a nih dawn thu an sawi a, "Vawi leh khata sum a chhuah vak hian harsatna a thlen palh a hlauhawm ve a ni. Group A leh B pawh kan pe thei thuai dawn a, February ni 10 velah chuan kan pek theih ngei kan ring," an ti.

Mizoram sorkar hian nikumah pawh khan sum dinhmunin a zir loh avangin sorkar hnathawk group C leh D-te hlawh a pe hmasa a, a hnuah group A leh B-te a pe leh a ni.