Governor-in B Sangkhumi a lawmpui

India rama civil mite chawimawina sang Padma Shri dawng tura thlan B Sangkhumi chu Governor PS Sreedharan Pillai-a'n nimin khan a kâwm a, lawmpuina thuziak a hlan.

President Ram Nath Kovind chuan January 25, 2021 khan Padma award chi thum dawng tur mi 119 a puang a; Padma Shri dawng tur zingah B Sangkhumi, Chaltlang telin, khawtlang rawngbawlna, a bikin hmeichhiate chawikanna leh hmeichhe rahbi tleute dinhmun siamṭhatna kawnga a thawh hlâwk vanga thlan a ni.

Governor chuan, mah­ni chhungkaw enkawlna piah lama mi dangte ṭhatna tura vantlang tana theihtawp chhuah ṭhin, mi tlawmngai fálte baka chawimawi phû an awm lo tih sawiin, "Vantlang tana rawngbawl hna hi Pathian tana rawngbawlna a ni," a ti. 

PS Sreedharan Pillai chuan, "Hetianga hna thawk ṭha India sorkarin chawimawina sang a hlan tlak Mizo hmeichhia zinga kan nei hi inchhuanna tham a ni," a ti a; B Sang­khumi chu duhsakna hlànin, Mizo hmeichhia zawng zawng tan entawn tlak leh chona petu a nih ngei a beisei thu a sawi.

B Sangkhumi hi sorkar hnathawk pension tawh a ni a, Higher & Technical Edu­cation Director a nih laiin MPSC member atan dah a ni. MPSC-ah hian kum kua thawkin, Chairperson pawh a lo ni tawh. MHIP Gen. Hqrs. President leh nihna dangte a chelh tawh ṭhin bawk.