Kan manifesto hi mithiamte nen Uluk taka kan duan a ni - ZPM

ZPM general secretary-te chuan nimin khan Aizawl Press Club-ah thuthar thehdarhtute an kâwm a; AMC inthlan atana an manifesto chu uluk taka mithiamte nena an duan a nih thu sawiin, "Kan tihhlawhtlin theih ngei turte an ni," an ti.

ZPM GS-te chuan, AMC-ah sorkarna an siam chuan Municipal Ward Committee din a nih tur thu sawiin, "Danin a phût angin mawhphurhna leh thuneihna an kutah hlan a ni ang a, a din chhan ang takin hna thawk theia siam a ni ang. Councillor kaihhruai Ward Committee chuan ward chhunga hmasawnna hna thawh tur work plan an siam ang a, kut tling taka thawh a nih theih nan an vil dawn a ni," an ti a; AMC din chhan pawi­mawh ber chu ward committee hmanga hna thawh a nih thu a sawi.

AMC-a chhiah lut zat leh a hmanna kimchang mipui hriatah puanzar ṭhin a nih tur thu sawiin ZPM GS-te chuan, "AMC-ah hian mipuite'n chhiah chi hrang hrang kan chhûng lut ṭhin. Chhiah lian deuh ber chu Property Tax a ni. Chhiah tling khawm hi ward chhunga hmasawnna hna thawhna tur a ni. Chhiah tling khawm zat te, eng anga hman ral nge tihte hi a petu mipui hriatah puanzar ṭhin a ni ang a, mipui pawhin chhiah pek an phûr phah ang," an ti.

ZPM GS-te chuan, sorkarna an siam chuan thlai thartu leh a leitute kalphung neia an indàwrna tur Vegetable Supply Chain Centre siam an tum tih sawiin, "Thlai thartute'n kalphung neia an thlaite an hralh theihna tur leh a leitute tan pawh rate mumal a awm theihna turin Vege­table Supply Chain Centre siam a ni ang," an ti a; centre chu Aizawl kawtchhuah pali velah dinin, a enkawl hna chu tender chhuahin mimal kutah hlan a nih tur thu an sawi. 

Aizawl khawpui vawn fai leh chei mawi ngaih pawimawh a nih tur thu sawiin, "Bawlhhlawh sâwngbàwl dan awlsam siam a ni ang. Aizawl hi khawpui vawn fai awlsam leh chei remchang tak a ni. Ruahmanna mumal awm se, khawpui titawp ṭhintu tuihâwk hi khawpui tlêng faitu ṭangkai takah a hman theih. Hmun tina hrui chi hrang hrang inthlung hnawk te, tui luankawr (drain)-a pipe inzamte hi thup bo tum a ni. Bawlhhlawh sawngbawl danah mipui tana awlsam tur kawnga ruahmanna siam a ni ang," an ti.

ZPM GS-te chuan, thiam inhlan chhawnna leh thiam duh zawng zirna 'Centre for Innovations & Trainings' siam an tum tih sawiin, "Senso hautak tham loa thiamna inhlan chhawnna te, thiam duh zawng zirnate hmun remchang awm se, ṭhalai tam tak hian mahnia deh chhuah neih an duh. Chu chuan ram sum deh chhuah a tipung thei dawn a ni," an ti a; centre aṭanga zir chhuak, mi rin tlakte chu an hmanraw mamawh zualpui pek a nih tur thu an sawi.

ZPM GS-te sawi danin, sorkarna an siam a nih chuan councillor zin hûl hûl tihtawp a ni dawn. State leh ram dang tih dan ṭha zir turin technical mi tirh an ni dawn a, chu'ng mite chu councillor pahnih khatin an kaihruai ang. AMC inthlan atana an manifesto-te chu an inzawrha satliah ni loin, an tihhlawhtlin theih ngei turte a ni.

A chunga tarlante bakah hian ZPM manifesto-ah mipui himna leh rálmuanna ngaih pawimawh te, mistiri leh thiam bik neite'n an kutchhuak an zawrhna tur municipal emporium siam te, Aizawl siamṭhatna leh zauhna (Aizawl Master Plan) mi thiamte hmanga siam te, bawhzui tâk lohte hai chhuah a, ennawn a, a taka chantir tura thawhte a tel bawk.