KHAWTHLIR

Serchhip District Election office buatsaihin nimin khan Systematic Voters’ Education and Electoral Participation (SVEEP) Marathon Race neih a ni a, district election officer Kumar Abhishek, bawrhsapin a hmanpui. DC chuan, vote nei tawhte leh la nei thar leh zel tur ṭhalaite chu mipui sorkar dinna turin vote thlak a pawimawhzia leh khua leh tuite tih ngei tur thil a ni tih hre reng turin a chah. Marathon-ah hian hmeichhia 13 leh mipa 38, an vaiin mi 51 an tel a ni.

State NSS Cell ruahmannain NSS volunteer-te'n nimin khan Civil Hospital, Aizawl blood bank-ah thisen unit 51 an pe. College of Vety Science & AH aṭangin mi 22, Modern English HSS aṭangin mi 17 leh JL HSS aṭangin mi 12-in an pe a; mipa 35 leh hmeichhia 16 an ni.

Mizoram Journalist Welfare Scheme (MJWS) Governing Board chu nimin khan an chairman Sangdingliana, IPR secretary hoin IPR Director pisaah an ṭhu a, MJWS hnuaia journalist damlote'n damdawia inenkawlna senso atan puihna an dilnate an thlirho. October 2020 leh kumin January thla inkara dilna lut zinga pali chu ṭanpuina pek turin an rél a ni.

Horticulture department chuan nimin khan Lungleia an conference hall-ah Bonsai Association Lunglei nen ṭang dunin Bonsai Exhibition cum Training an buatsaih. He hunah hian mi 11 telin, bonsai 76 pho chhuah a ni a, a ti ṭha mi pathum hnenah lawmman hlan a nih bakah, exhibition-a tel zawng zawng lawmman pek a ni. 

State Referral Hospital-ah Covid-19 vei mi pali enkawl mek a ni. Nimin khan mi pakhat dah luh a ni a, pakhat chhuahtir a ni bawk. SRH-ZMC Bulletin tarlan danin, enkawl mek mi pali chu Isolation ward-ah an awm a, oxygen mamawh an awm lo. Nimin vek khan ICU Extension-a awm ṭhin chu damdawi-in dangah sawn a ni.