Loneih leh bawnghnute sâwngbàwlna Tihchangtlunna dan tur sawiho a ni

Agriculture minister C Lalrinsanga, Cooperation department changtu ni bawk hoin nimin khan RCS meeting hall-ah NABARD hnuaia loneih leh bawnghnute sâwngbàwlna tihchangtlunna, 'Agriculture Infrastructure Fund' (AIF) leh 'Dairy Processing & Infrastructure Development Fund' (DIDF) chungchang sawihona neih a ni.

C Lalrinsanga chuan, sorkar laipuiin loneih lamah hmasawnna a awm theih nan kalphung thar a duan thu sawiin, "AIF hi thil thar, lo nei mite'n an ṭangkaipui ngei theihna tur ruahmanna a ni a, loneih bakah ran vulhte pawh khaikhawma kalkawptir chu a tum lian tak a ni," a ti.

Minister chuan, Cooperation department chu department langsar ni lo mah se, an hnathawh leh project kalpuite chu ram economy nghawng thei a nih thu sawiin, "Project-te hian department tam tak an khaikhawm a, chungte hlawtlinna chuan nasa takin economy-ah nghawng ṭha neiin hmasawnna a thlen thei a ni," a ti.

Meeting hi Cooperation secretary Dr Lalzirmawia Chhangte-in a kaihruai a, Mizoram NABARD Regional office DGM T Sudhir chuan AIF chungchang a sawifiah. Mizoram NABARD Regional office AGM H Lalhmachhuani'n DIDF kalphung tlangpui a sawi bawk.

NABARD hotute sawi danin, AIF atan sorkar laipui chuan ram pum tan cheng vbc. 1,00,000 a ruahman a, kum 2021-2030 thleng kalpui tur a ni. Loan pek tur ang ang chu kum 2024-ah pek zawh hman tur a ni a, Mizoram tana loan pek theih zat chu cheng vbc. 196 a ni.