Synod Bookroom-in budget an pha lo nasa

Synod Bookroom chuan December 2020 thleng khan kum 2020-21 budget aṭanga 47.2% chiah an la hmu a, thla kaw chhungin 52.6%-in budget an la pha lo. Lehkhabu leh thil dangte kum dang aia an hralh tlem chhan chu Covid-19 léng leh inkhàrkhip vangah an ngai.

Financial year 2020-21 kal mekah Synod Bookroom hian April-December 2020 chhunga budget aṭanga 47.2% chiah an la hmuh avangin, kum hmasaa April-December 2019 chhunga an hmuh chu Rs. 7,94,98,301-in an pha lo tih Bookroom manager Lalniliana chuan a sawi a, "Hriat theih tirh aṭangin Synod Bookroom-in budget a phâk loh vawi khatna tur a ni," a ti. 

Kum 2019-20 atana Synod Bookroom budget chu Rs. 11,64,00,000 a ni a, kum 2020-21 ah chuan Rs. 15,00,00,000 a ni thung a, budget punna chu Rs. 3,36,00,000 a ni. April-December 2020 chhunga an sum lâk luh chu budget aṭangin 47.4% a ni a; chutih laiin, budget an la phâk lohna chu 52.6% a tling.

Lalniliana chuan kum 2020-21 budget chu an pha dawn lo hlea an hriat thu a sawi a; financial year hmasaah chuan October thlaah budget an khûm tawh tih a sawi bawk.

Synod Bookroom Manager sawi danin, Covid-19 léng vangin March 2020-ah an Bookroom-te khâr a ni a, April thla pum an hawng lo. Nikum May thla aṭangin an hawng zauh zauh a, zirna-inte khâr a nih avangin zirlaibu leh uniform an hralh thei lo a, inkhawm theih a nih loh avangin 'Nilai Zan leh Beihrual Thupui' bu leh Sunday School zirlaibute an hralh thei lo.

Mobile workshop an ti thei lo a, kum tina an tih ṭhin Reduction Sale an ti thei lo a; Synod Inkhawmpuiah an inzuar thei lo a, sorkar department nena indawrna leh literature campaign an tih thei loH bawk. Hengte hi an inhralh tlem chhan a ni.

Synod Bookroom hian 2019-20 financial year-ah April-December 2019 chhungin Rs. 15,07,12,555 an hmu a, 2020-21 financial year-a April-December 2020 chhungin Rs. 7,12,14,254 an hmu a; kum hmasa an phâk lohna chu Rs. 7,94,98,301 a tling.

Kum 2019-a December thla bikah Rs. 1,96,38,821 an hmuh laiin, December 2020-ah chuan Rs. 1,28,88,074 an hmu a; December thla bikah hian kum hmasa chu Rs. 67,50,747-in an pha lo bawk.

Covid-19 léng leh inkhàrkhip chu district tina Synod bookroom-te leh khaw 43-a distributor-te'n an tuar vek a; kum hmasaa an inhralh zat chanve an hralh pha lo deuh vek. Chutih laiin, December thla bikah chuan, kum 2019 aiin 2020-a inhralh ṭha zawk branch an awm ve bawk.

December thla bika kum 2019 aia 2020-a inhralh ṭha branch te chu - Aizawl Chanmari, Bawngkawn, Vaivakawn, Serchhip leh Siaha branch-te an ni a; branch dang zawng chuan kum hmasa an pha lo a ni.

Synod Bookroom hian district tinah bookroom an neih bakah, Mizoram pumah distributor 43 an nei a, Synod Bookroom, Mission Veng aṭanga zuar chhuak eng emaw zat an awm bawk.