DC-in East Tuipui model village a tlawh

East Tuipui Assembly constituency bialtu MLA-in model village atana a thlan Khuangleng khua chu nimin khan Champhai bawrhsap Maria CT Zuali'n a tlawh a, Khuangleng VC Hall-ah khawtlang hruaitute nen inkâwmin, model village chungchang inhrilhfiahna leh hmalak dan tur sawihona hun an hmang.

Maria CT Zuali chuan, model village ni turin theihtawp chhuaha inzir a ngaih thu sawiin, "Khaw dangte entawn tham ni tura lungrual taka thawhho a ṭul. VC, tlawmngai pawl leh sorkar hnathawkte an pawimawh hle dawn a, hriselna ngaih pawimawh a ṭul dawn," a ti a; model village ni tura bul ṭan an nih angin hmanhmawh vut vut loin, a bulthûm aṭanga hmalak tum turin a chah.

Champhai DC chuan, Khuangleng hmasawn nan sorkar department hrang hrangte'n theihtawp an chhuah dawn thu leh an vil zui tur thu a sawi a; sorkara innghat bur lo a, mimal hmasawnna ngai pawimawh tur leh mahni thawh theihte hlen chhuah tum turin a chah bawk.

Model Village chungchang in­hrilhfiahna leh zirhonaah hian hlâwk zawka buh thar leh ran vulh hmanga ei leh bâra intodelh theih dan tur te, zirna ṭha zawk nei tur leh nungcha leh ramngaw humhalh ṭulna te, hmasawnna ruhrel siam kawnga pawimawhte leh khawtlang nuna pawimawhte an inzirtir a ni.