AMC inthlan atan party-te an campaign mek

February 16, 2021-a Aizawl Municipal Corporation (AMC) inthlan turah political party hrang hrangte chu ngawrh takin an campaign mek. Ward hrang hrangah campaign hawnna hun an hmang tawh a, an la hmang mek zel bawk.

Congress party chuan nimin khan Tanhrilah AMC Ward-XI campaign hawnna hun an hmang a, MPCC treasurer Zodintlunga Ralte leh PAC member John Rotluangliana ten an hmanpui.

Zodintluanga Ralte chuan, Ward-XI chhunga Congress mipuite'n nasa leh zuala ṭan an lâk a ngaih thu sawiin, "MNF party AMC councillor-te'n an vengah hmasawnna hna thawh an nei em tih ngun takin kan en chian a ṭul a, Aizawl hmasawnna leh thianghlimna tluchhe mek siamṭha leh turin Congress kan sorkar a ngai a ni," a ti.

AMC-a MNF sorkarin bawlhhlawh paih dan an siam chu mipuite harsatna leh phurrit a tling tak meuh tih sawiin Zodintluanga chuan, "Awmze awm miah loa bawlhhlawh paihna hi AMC-ah kan tling a nih chuan kan tlin aṭanga ni nga chhungin kan siam ṭha em em ang," a ti a; bawlhhlawh paih thei si lo, bawlhhlawh paih man cháwi rengte chu an titawp nghal tur thu a sawi bawk.

MPCC hian January 26, Thawhlehni khan ITI Veng Volleyball Court-ah AMC ward-XVIII campaign hawnna hun an hmang bawk a; MPCC general secretary TT Zothansanga, MPYCC president Dr Lalmalsawma leh Ward-XVIII candidate K Lalnunsiama ten thu an sawi a ni.

MNF chuan nimin khan ITI Vengah AMC Ward-XVIII campaign hawnna hun an hmang a, MNF senior vice president Tawnluia leh bialtu MLA Prof. F Lalnunmawia ten an hmanpui.

Tawnluia chuan, AMC inthlanah MNF party-in an la tichhe ngai lo a, kum 2015-ah phei chuan state-a Congress sorkar lai pawhin seat 11 lain party malin sorkarna an siam thu a sawi a, "Opposition lai pawha kan sorkar thei a nih chuan, eng vangin nge ruling kan nih lai leh nghalin kan tlak ang? MNF-in sorkarna kan siam ngei ka ring," a ti.

MNF chu Pathian hming lam chunga Zoram mipui rawngbawl tura din a nia sawiin Tawnluia chuan, "Keini chuan Pathian behchhanin ram rawng kan báwl tlat dawn. Pathian leh kan ram tan kan ti a, kan ti zel dawn a ni," a ti bawk.

MNF hian nimin vêk khan Republic Veng community hall-ah ward-XVII campaign hawnna hun an hmang a, minister of state Robert Romawia Royte leh MLA H Biakzaua ten an hmanpui.

Robert Romawia Royte chuan, MNF sorkar chu sum awm si loa lungphûm eng emaw zat phûmah puh an nih chungchang sawiin, "Administrative approval awm loin lung kan phúm ngai lo. Kan hmuh tawh aṭanga chhûta 50% pawh kan la phúm hman lo zawk. Hetianga min ringhleltute hian sum lian tham an hmuh chhuah ve ngai loh vang a ni," a ti.

Robert Romawia chuan, AMC inthlanah MNF chu chiang takin an chak dawn nia sawiin, "Chakna chhan tur point 100 vel kan nei," a ti a; Serchhip bialah Assembly by-election-ah pawh an chak dawn nia sawiin, "ZPM chuan Pu Duhoma hming an chhuang a, keini MNF chuan Lalpa hming a ni kan chhuan ni," a ti bawk.

Inkhawmah hian ward XVII-a MNF candidate David Zohmangaiha pawhin thu a sawi a ni.

ZPM chuan January 26, Thawhlehni khan Durtlang unit-I buatsaihin campaign hawnna leh inbuatsaihna hun an hmang a, bialtu MLA Vanlalhlana'n a hmanpui. Vanlalhlana chuan, AMC inthlan turah theihtawp chhuah a ṭul thu sawiin, an chak ngei a beisei thu a sawi.

Aizawl North-I bialtu MLA chuan, "Zo fate Jerusalem Aizawl khawpui hi thianghlim leh entawn tlaka siam a ngai a, Mizoram mai ni lo, Mizoram páwna Zo fa zawng zawng tan inpui a ni a, belh tlak leh chhuan tlaka kan siam a hun tawh tak zet a ni," a ti.

ZPM general secretary TBC Lalvenchhunga pawhin thu sawiin, AMC inthlan turah state-a sorkar laiin sorkar lai an nihna changchawiin sorkar lai candidate-te thlan tlin a ṭul thu auhlaah an nei mek tih a sawi a, "Hei hi mipui bum tumna leh sorkar ṭha lo zia a ni. Kan state sorkar hi sorkar ṭha ni se, hetiang hi a sawi lo ang," a ti a; dan angin AMC sum chan tur fel taka ruahman vek a nih thu a sawi.

TBC Lalvenchhunga chuan, "State leh Central sorkarte inkarah sum sem dan tur Mizoram Finance Commission Act angin central sum lo kal chauh ni lo, state sum thawh chhuahte pawh mumal leh awmze nei takin, dan angin tualchhung sorkarte hian chanpual an nei a ni," a ti a; "Sorkar ṭha chuan sawi chhuah ngai loin sum sem dan tur a duang mai a, sem zâi phal lo ruling sorkar an nih chuan vote tlak an ni lo tihna a ni," a ti bawk.