Organic Food India Conclave 2019-ah Agriculture minister C Lalrinsanga a tel

Agriculture minister C Lalrinsanga chuan August 31, Inrinni khan Novotel, Mumbai-a buatsaih Organic Food India Conclave 2019 a hmanpui a, thu sawiin, sorkar laipui ruahmannain India hmarchhak bialah Mission Organic Value Chain Development (MOVCD) kalpui mek hnuaiah Mizoramah chuan thingpui, Mizo hmarcha, aieng leh sawhthingahte beihpui thlak mek a nih thu a sawi.

C Lalrinsanga chuan, prime minister Narendra Modi-a'n India hmarchhak bial chu organic movement kalpui nan ṭha a tih thu sawiin, "Sorkar laipui ruahmanna hnuaiah MOVCD kalpui mek a ni a, Mizoramah pawh MOVCD hnuaiah hian thingpui, Mizo hmarcha, aieng leh sawhthingahte beihpui thlak mek niin, a hlawhtlinna pawh kan hmu chho zel a ni," a ti.

Agriculture Minister chuan, Mizo hmarcha chu tunah hian Geographical Indication tihfel tawh a nih thu sawiin, "Mizo hmarcha hi dan ang thlapa Mizote ta a ni tawh," a ti a; Mizo hmarcha chu a hlutna a sàn thu leh organic movement hnuaia nasa taka thar tam tum a nih thu a sawi.

Organic Food India Conclave 2019-ah hian India ram chhung leh ram páwna thlai lam ngaihventu mi eng emaw zat an tel a ni.