CM Zorama'n Union Minister-te a kâwm

Chief minister Zoramthanga chuan kar kal ta khan sorkar laipuia minister hrang hrangte a kâwm a, Mizoram mamawh hrang hrang a sawipui a, chu'ng zingah chuan Zoram Medical College (ZMC) chu su­per­spe­ciality hospi­tal ni tura tihchangtlun chung­chang a tel.

CM Zoramthanga chuan August 30, Zirtawpni khan Health and Family Welfare minister Dr Harsh Vardhan chu a pisaah a kâwm a; Zoram Medical College tih­changtlun dan tur Mizoram sorkarin a ngaih pawimawh thu a sawi.

Zoramthanga chuan, ZMC chu super speciality hospital ni tura thuam ṭhat zel a ṭul thu sawiin, chu chu a remchan loh pawhin speciality hospital ni tura din a duh thu te, staff quarters leh student hostel changtlung tak din thuai a ṭul thute a hrilh. Chu'ngte chu tun hnaia hawn Pradhan Mantri Swasthya Suraksha Yojana (PMSSY) hnuaiah tih theih a beiseiawm thu, Union Minister chuan a sawi.

Chief Minister chuan, district thar pathumte tan district hospital din thuai a ṭul thu a sawiah Harsh Vardhan chuan, National Health Mission(NHM) hnuaiah rawtna thlen turin a lo ràwn a; Mizorama Aspirational District - Mamit district tan district hospital awm sa tihchangtlun chungchangah, detailed project report (DPR) siam thuai turin leh a lo en zui tur thu a hrilh bawk.

Mizoramin central pool hnuaia MBBS quota a neih ṭhin, kumina tihtawp tâk chu neih let leh dan awm se a duh thu Zoramthanga chuan Union Health Minister a sawipui a ni. CM Zoramthanga hian August 29 khan Minority Affairs minister Mukhtar Abbas Naqvi leh minister of state for Health and Family Welfare Ashwini Kumar Choubey te New Delhi-a an chenna in ve veah a kâwm.

Zoramthanga chuan, sorkar laipui hmalakna Prime Minister's Jan Vikas Yojana (PMJVY) chuan Mizoram huam tel ve se a duh thu a thlen. PMJVY hnuaiah hian hnam tlem zawk leh hnuaihnung zawkte tan ei leh bara an intodelhna tur leh nun­phung changkang zawk an neihna turin zirna, hriselna leh eizawn thiamna (skill development) tihhmasawnte a tel a ni. Mukhtar Abbas Naqvi chuan, CM Zoramthanga rawtna ang­in PMJVY hnuaiah Mizoram telh ngei ṭha a tih thu a sawi.

Chief Minister hian Ashwini Kumar Choubey nen an inkawmnaah, ZMC chungchang te, district hawn thar pathuma damdawi-in tihchangtlun chungchangte a sawi a ni. CM Zoramthanga hi State Planning Board vice chairman H Rammawi leh Delhi Mizoram House-a resident commissioner-te'n an ṭawiawm a ni.