Vakiria neitute hnenah Devi Awards

The New Indian Express-in hmeichhe hlawhtlingte hnena chawimawina an pek ṭhin, 'Devi Awards' chu August 31, 2019 zan khan Kolkata-a ITC Royal Bengal hotel-ah sem a ni a, Mizoram aṭangin Vakiria dawr neitute - Laldinsangi, Lalsangzeli leh Lalrinpuiite'n an dawng.

Devi Awards hi an sem chhuah vawi 17-na a ni a, he award hi mahni kalna kawnga hmeichhe hlawhtling leh midangte nuna danglamna thlentute hnenah hlan ṭhin a ni a; Union Minister for Textiles, Women & Child Development Smriti Irani-in a hlan.

Smriti Irani chuan, "Hmei­chhiate hi kan hlawhtling thei a ni tih a chiang a, kan theihna hi kan inringhlel ngai tur a ni lo," a ti. Tun ṭumah hian Mizoram aṭanga he lawmman dawng hmasa ber Vakiria neitute leh India rama hmeichhe dang pariatte hnenah hlan a ni.

Devi Awards dawngtu dangte chu -Indian classical dancer lar Alokananda Roy, social entrepreneur leh environmentalist Ekta Jaju, filmmaker Pritha Chakraborty, fashion lama kawng thar sialtu Sujata Chatterjee, entrepreneur leh fashion visionary Madhu Neotia, environmental activist Temsutula Imsong, educator and social entrepreneur Parmita Sarma leh lifestyle entrepreneur Ritu Agarwal-te an ni.

Vakiria hi kum 2005-ah unau pathum Lal­dinsangi, Lalsangzeli leh Lalrinpuii-te din a ni a, an pathum hian Aizawl Venglaia cheng an ni. Embroidery khawl pakhata bul ṭanin Compu-terised Embroidery tih hming puin an dawr hmasa ber an hawng a. Dawr hming hi Vakiria tiin an thlak a, fashion lam zirna Vakiria Institute of Fashion Technology (VIFT) ni zui ta chu kum 2009-ah khan bul ṭanin Mizorama designer ṭha tak takte hi VIFT aṭanga inzir chhuak an ni.

Tunah hian hmun hrang hrangah dawr neiin hmei­chhe thawmhnaw chi hrang hrang an ṭhuiin an zuar a, mipa thawmhnaw dawr an siam bakah school uniform leh sports wear lamah ke an pen bawk a, hnathawktu 120 chuang an nei a ni.