Mizote tana la hlauhawm tur BJP dan siam MNF sorkarin dodalna a tilang ngam lo - MPCC

Mizoram Pradesh Congress Committee (MPCC) Media department chuan August 31, Inrinni khan Aizawl Press Club-ah thuthar thehdarhtute an kâwm a, "MNF sorkarin Mizote tana la hlauhawm tur central-a BJP sorkar dan siam dodalna a tilang ngam lo," an ti a, dan thar siam tur dodalna kawngah Mizoram mipuite ṭang rual turin an sáwm.

MPCC Media chairman Lallianchhunga chuan, Indian Forest Act, 1927 Amendment Bill chu The Schedule Tribes and Other Traditional Forest Dwellers (Recognition of Forest Rights) Act, 2006 nasa taka palzûtna tur a nih thu sawiin, "India rama tribal hrang hrangte leh tlang ram lo neia ei leh bar zawngte tan harsatna a thlen thei dawn. Mau leh raw tuai khawrhtute pawhin harsat­na an la tâwk thei ang," a ti.

Lallianchhunga chuan, BJP sorkarin Indian Forest Act, 1927 Amendment Bill siam a tum chungchang chhui chiangtu turin MPCC-in mem­ber pali awmna Study Group an din tih sawiin, "Study Group hian Chief Minister hnenah Mizoram tana him lo leh siamṭhat ngai lai nia an hriatte thlang chhuakin memorandum an thehlut a ni," a ti a, Mizoram sorkar aṭangin hmalakna hmuh tur a la awm loh thu a sawi.