KHAWTHLIR

August 31, Inrinni khan Serchhip AOC Veng Welfare Committee-in Serchhip District Hospital tan thisen unit 18 an pe a, petute mipa 15 leh hmeichhia pathum an ni a; ṬKP Lawngtlai Electric Veng Unit pawhin Lawngtlai District Hospital tan unit 17 pein, a petute mipa 14 leh hmeichhia pathum an ni. August 30 khan Pachhunga University College NSS Unit-in Aizawl Civil Hospital (ACH) tan thisen unit 181 an pe a; Edenthar Veng Branch YMA-in ACH tan unit 42, Chhipphir Pastor Bial PYD (NEI)-te'n Lunglei Civil Hospital tan unit 36 leh ṬKP, Noaohtla Unit-te'n Siaha District Hospital tan unit 9 an pe bawk.

Vaivakawn-Bazar Bungkawn via Dawr­pui Vengthar kawngah PWD-in concrete pavement hmanga kawng siam hna an thawh avangin, lirthei tlân tlang theih a ni lo a, hna thawh zawh a nih hma chuan he kawngpuiah hian lirthei tlân theih a ni dawn lo. 

Kolasib-a Legal Metrology department leh Vairengte Consumer Union hruaitute chuan August 29, 2019 khan Ar Em Filling Station, Chhim­luang leh MIZOFED POL, Vairengteah petrol leh diesel ṭhat leh ṭhat loh an endik a, dan phal chin chhungah vek a awm tih an finfiah. Legal Metrology leh MCU-te hian Auva Gas Agency, Vairengtea eirawngbawlna gas an endik bawk a, bûk tling lo bûr pali an man.

PHE department, Mamita Swachh Bharat Mission (Gramin) ambassador Laltharzeli chu sorkar laipuia Ministry of Jal Shakti hnuaia Department of Drinking Water and Sanitation chuan Mizoram aiawha national award dawng turin an thlang. Award hi September 5 khian hlan a ni ang.

Pathiannia chhuak chanchinbu Zalen chu a chhutna offset press lamah power supply a awm theih loh avangin nimin khan a chhuak thei lo a, chhiartute hriat­thiamna an ngen a ni.