Gas home delivery kalpui ṭan a ni dawn
Mipuite chenna ina eirawngbawlna gas sem (home delivery) kalpui ṭan turin tun hnaiah department-in chak takin hma a lak thu Food, Civil Supplies & Consumer Affairs (FCSCA) department director Dr Lalhriatzuali Ralte chuan a sawi.
Gas home delivery hi September thla aṭangin pilot project angin College Veng, Aizawlah kalpui ṭan tum a ni. August 30, Zirtawpni zana Godfrey Tower, College Venga Public Awareness Campaign on LPG Home Delivery buatsaihah thu sawiin Dr Lalhriatzuali chuan, Supply department-in kum 1999 aṭangin gas home delivery ti turin hma a la ṭan tawh tih a sawi a, "Mizoramah hmunhmá rem loh vang te, LPG mamawh zat hmuh theih loh vangte leh harsatna hrang hrang vangin tun thlengin tihpuitlin theih a la ni lo," a ti.
FCSCA Director sawi danin, LPG home delivery tihpuitlin mai theih loh chhan pakhat chu - Indian Oil Corporation (IOC)-in home delivery charge a phal zat cylinder pakhatah Rs. 18.57 (tun hnaiah Rs. 20.50) chu Mizoram ang tláng ram tan chuan a tlem lutuk vang a ni a; tunah pilot project anga bul ṭan lehin, ruahmanna thar siam a ni.
LPG home delivery hi pilot project angin College Venga LPG consumer thlan chhuahte hnenah September aṭangin kalpui tum a ni a, a tahtawlin veng danga chhunzawm tum a ni. FCSCA department chuan, LPG home delivery ruahmanna hi a tirah buaina thlentu angin lang mah se, khuareiah mipui tan hamṭhatna leh awlsamna thlentu a ni dawn tih a tarlang a; LPG consumer te, MIDA te, NGO te, local council-te leh mipuite ṭawiawmna leh thawhpuina an ngen.
Sorkar thuchhuah tarlan danin, LPG home delivery ti tur hian online booking (IVRS/SMS/Internet) tih a ṭul dawn a, consumer-te'n anmahni bialtu LPG distributor kal chilhin an book tir thei bawk ang. Online booking ti thiam lote tan FCSCA department-in a tih dan tur entirna video clip a siam a, a ṭul angin inzirtirna kalpui mek zel a ni. Hriat chian duh nei tan indane toll free no. 1800-233-3555-ah zawh theih a ni bawk.
Supply department chuan, LPG home delivery chu vawi leh khata zau tham taka kalpui nghal a nih chuan, consumer-te tan harsatna a siam an hlauhthawn avangin, veng thlan bikte aṭanga bul ṭanin, veng dangah tih belh zel tum a nih thu an tarlang.
Chenna Ina Eirawngbawlna Gas Sem
l September, 2019 atangin kalpui dawn
l FCSCA lamin ruahmanna an siam
l College Veng, Aizawlah enchhin tur a ni
l A tahtawlin hmun dangah kalpui a ni ang
l Phone no1800-233-3555 ah zawh fiah theih