High Court-in sorkar thupek a hnâwlsak; LAD-in Tlungvel V/C ṭhiahna thupek a sût

Mizoram sorkara Local Administration Department (LAD) chuan, Mizoram sorkarin Tlungvel Village Council (V/C) ṭhiahna thupek, August 6, 2019-a a siam tawh chu High Court thupek avangin sût (set aside) a nih thu a puang. Hemi chungchanga hriattirna (notification) hi August 30, 2019 khan tihchhuah a ni.

Thu dawn danin, Mizoram sorkar chuan August 6, 2019 khan Tlungvel V/C a ṭhiat a, sorkar thu chu Gauhati High Court, Aizawl Bench-ah khin a ni. Sorkarin Tlungvel V/C a ṭhiah dawnah danin a phût anga insawifiahna hun a pe lo a, The Lushai Hills District (Village Council) Act, 1953 Section 25(1) bawhchhiatna a nih avangin High Court chuan Tlungvel V/C ṭhiahna order chu dan loa thil tihah ngaiin August 21, 2019 khan a hnâwl (set aside) ta a ni.

High Court order-ah chuan, 'The impugned notification dated 6.8.2019 passed by the Secretary, Govt. of Mizoram, LAD, dissolving the Tlungvel Village Council is found to be arbitrary and the same is accordingly set aside,' tih a ni.

Mizoram sorkarin Tlungvel V/C ṭhiahna thupek a chhuah hnuah, August 17, 2019 khan circle inspector (CI)-in Tlungvel V/C letterhead, seal leh account bute a chhuhsak nghal a; August 21-a High Court-in sorkar order a hnâwl hnuah pawh nimin thleng khan Tlungvel V/C hnenah thil pawimawh CI-in a chhuhsakte chu pek let a la ni lo.

Gauhati High Court order chung­changah hian MNF party chuan August 26, 2019 khan press release siamin, High Court hian sorkar order a ṭhiat ni loin, Tlungvel V/C-te chu ṭhiah an nih lohna chhan tur sawifiah turin hun a pe mai zawk angin an lo tarlang tawh a ni.

August 26-a MNF party press release chu August 29, 2019 khan Congress party-in press release hmang veka chhángin, thu dik loa mipui hruai sual tumah an puh a; MNF party leh Mizoram sorkar chu High Court thupek zah tur leh a rang thei ang bera zawm turin an phût a ni.

w Sorkarin August 6-ah V/C a ṭhiat

w Ṭhiahna thu Gauhati High Court-ah khin a ni

w High Court-in ṭhiahna order a hnawl

w Aug 30-ah V/C ṭhiah thupek sût thu tichhuak