Political fitness a ṭangkai tawh lo - Lalchhandama Ralte

School Education minister Lal­chhan­dama Ralte chuan, "Kalphung thar­ah political fitness a ṭangkai tawh lo," a ti. He thu hi August 29, 2019-a Hrangbana College Week khârna inkhawm, HBC Golden Hall-a a sawi a ni.

Lalchhandama Ralte chuan, "Tunlai khawvel kalphung tharah ṭhalaite tan dam khawchhuak turin political fitness a ṭangkai tawh lo, a tak taka fit nih a ngai tawh. Mipui pawhin rilru puthmang kan thlak a ṭul, political fitness aṭanga luh tum phêt an awm ṭhin a, hei hi tunlai khawvel system tharah thil theih a ni tawh lo. A thiam chu an tling mai dawn a ni," a ti a; School Education department-in zirtirtu muster roll-a mi ṭhahnem tak a lak mekah pawh a thiam leh 

ṭha apiang an tling mai dawn niin a sawi.

Hun vawn ṭhat leh vawn dik a pawi­mawh thu sawiin, "Zoram ṭhalaite hi a hun taka engkim ti thei tura inbuatsaih a ngai tawh a, hun vawn dik a, vawn ṭhat a pawimawh, hun vawng ṭha lote hian hmasawnna an uai fual a ni," a ti. Faina leh thianghlimna chungchang sawiin, "Ram changkang kan sawi hian an fai, an thiang­hlim kan ti ṭhin a, hei hi kan ti ve thei reng. Faina leh thianghlimna kawngah ṭhalaite hi mi dangte entawn nih a ṭul a, college ṭha ni turin thianghlimna leh faina hi tehna pawimawh tak a ni," a ti.