Fit Dawrpui Centre din dawn

Sports & Youth Services (SYS) minister Robert Romawia Royte chuan, August 31, Inrinni khan Dawrpui Multipurpose Centre a tlawh a; he Centre-ah hian fitness centre-cum-gym chang­tlung tak, Fit Dawrpui Centre din a nih tur thu a sawi.

Tourism Minister Robert Romawia chuan, Aizawla hotel-ahte gym ṭha a awm loh avangin khualzin tam takin harsatna an tâwk nia sawiin, "An chhawr phâk Aizawl lailia fitness centre ṭha tak neih a ṭul hle. He Fit Dawrpui Centre-a gym-ah hian hmanrua chang­tlung tak tak leh qualified fitness trainer-te awmin, inbualna leh chawlh hahdamna hmunte pawh siam tum a ni. Physiotherapist leh sport doctor-te pawhin a ṭul angin an vil ang," a ti.

Robert Romawia chuan, Aizawl Civil Hospital compound-a Trauma Centre sak atan Health department-in sum an nei tawh a, buaipui mek a nih thu a sawi a; Dawrpui Indoor Basketball Centre sak tura ruahman pawh PWD-te'n an buaipui mek thu a sawi bawk.