Thla 20 chhungin drug license 454 titawp

Health department-a FDA-in an chhinchhuah danin, January 2018 aṭanga kumin August thla thleng khan drug license an tihtawpsak 454 zinga 160 chu Aizawl district-a mi a ni a, license an tihtawpsak tlemna ber Siaha district-ah mi 18 an tihtawpsak.

Health Services joint director (FDA) Lalsawma Pachuau chuan Vanglaini palai zawhna chhángin, damdawi license tihtawp tam ber chu ṭhalaiin ruih nana an hman ṭhinte dan loa an rûk nasat vang a nih thu a sawi a, "License pek chhuah dan nena inmil loa damdawi ruih theih zawrh vang te, license la chhuak si dawr titawp leh mai te, dawr kilkhâwr taka awm, thawktute'n an hmuh zawh mai lohte a ni," a ti.

Damdawi zawrh phalna an pek zingah ruihna atana an hman ṭhin zuar leh dan loa hralh report an dawnte chu an enfiah zel tih sawiin Lalsawma chuan, "Sesawng, East Phaileng, Khanpuiahte pawh kan kal. Khanpuiah chuan all India-a damdawi zawrh theihna neia insawi an awm a, kan kal a, Manipur aṭanga damdawi zawrh phalna an rawn zawrh chu Rs. 50,000-in an lo lei a, an ngaihṭhaloin V/C-te punin a zuartute hnenah an thleng leh a ni," a ti a; drug license chu state pakhat chhungah chauh neih theih a nih thu a sawi.

Lalsawma Pachuau chuan, Drugs and Cosmetics Act Section 66-in damdawi zawrh phalna (license) tihtawp phalna a pek thu leh chu dân hmang chuan hma an lâk ṭhin thu a sawi a, "Drugs and Cosmetics Act Section 18C chuan license nei lo chunga damdawi zuar ve ringawt ṭhinte man theihna thuneihna min pe bawk a ni," a ti.

Health Services Joint Director (FDA) sawi danin, damdawi an mansak, court-a thleng chinte chu a tam tham deuh leh drug license nei loa zuar an ni tlangpui a; chutiang chu kum thum aia rei lo jail-a tàntir leh pawisa chawitira hrem theih niin, court-in táng tura a hrem pawh an awm nual tawh.

FDA-in January 2018 aṭanga August 2019 thlenga damdawi zawrh chungchanga dan bawh­chhiat vanga drug license an tihtawpsak tawh zat leh insawifiah tura an tih (show cause notice pek) zat chu a hnuaia mi ang hi a ni.