RUSA hnuaia assistant professor tura lakte appointment order pek a la ni lo

Rashtriya Uchchatar Shiksha Abhiyan (RUSA) hnuaia college hrang hrang atana assistant professor tura lak thar mi 72 chu nimin thleng khan appointment letter pek a la ni lo.

Mizoram Public Service Commission (MPSC) chuan assistant professor tur lak hna hi an kalpui a, screening ṭum hnih neih a nih hnuah interview hmanga lak a ni. July 12, 2019 khan interview zawh a ni a, hemi ní vêk hian a tlingte hming tàr chhuah a ni. Hetih lai hian, assistant professor tura tlingte chuan nimin thleng khan appointment letter an la dawng lo.

Assistant professor atana lak tharte chuan Vanglaini palai zawhna chhangin, appointment order an la dawn loh chhan chu official-in hriattir an nih loh thu an sawi. Assistant professor atana lak ṭhenkhatte chuan appointment order an dawn loh chhan RUSA hotute an zâwt a ni.

Thu dawn danin, RUSA hotute chuan, RUSA leh Mizoram sorkarin assistant professor lak tura inremna an ziah laiin Mizoramah sorkar hnathawkte hlawh chu 6th Pay a la ni a, tunah Mizoram sorkar hnathawkte'n 7th Pay an hman tawh avangin RUSA-a thawkte hlawh tur chu sorkar laipui hotute nen sawiho leh tur a ni. Hlawh chungchang chu September 2019 chhungin sawiho leh tura tih a ni.

Assistant professor 72-te chu RUSA hnuaia hlawh an la phawt ang a, RUSA a tàwp hnuah chuan Mizoram sorkar chhawr zui tura tih an ni. RUSA hnuaia assistant professor tur lakna atan hian kumin kum tir lamah advertisment chhuah a ni.