Dinhmun azirin sikul khâr dawn

School Education minister Lal­chhandama Ralte chuan, khawpui chhunga sorkar sikulte zir chian a, an dinhmun azira khâr mai turin thutlukna an siam thu a sawi.

MNF member Lalrintluanga zawhna kal zelah School Education Minister chuan, "Khawpui chhunga sikul awmte zir chiang a, zirtirtute leh zirlaite awm dante kan zir chiang ang a, an dinhmun azirin khâr mai ni se, kan ti. Sum sênna  awm lo, lehkhabu leh chawchhun free-ah lo lut turin kan sáwm lawm lawm a ni. Session tharah chuan hma kan sawn deuhin a rinawm," a ti.

Lalchhandama Ralte chuan, private leh lumpsum grant-a adhoc aided enkawl mek high school leh higher secondary school-te upgrade chungchang sorkarin a ngaihtuah mek thu sawiin, "Sorkarin grant-in-aid a pek mek high school leh higher secondary school 43 an awm," a ti a; sikul upgrade a nih dawnin sorkarin sikul perfomance leh location-te an thlîr tur thu a sawi.