Rashtriya Poshan Maah hawn a ni

September thla chhung hian naupangte'n chaw ṭha an ei theihna tura Poshan Abhiyan hnuaia beihpui thlakna Rashtriya Poshan Maah (National Nutrition Month) hman a ni dawn a, nimin khan Social Welfare department (SWD) directorate conference hall-ah SWD minister Dr K Beichhua'n a hawng.

Poshan Maah hawnna inkhawm hi SWD director Vanlalpianpuii'n a kaihruai a; Dr K Beichhua chuan, Poshan Abhiyan chu March 8, 2018-ah prime minister Narendra Modi-a'n a hawn tawh thu sawiin, naupang ṭhang ṭha thei lo, ei tur ṭha neih loh vanga an nih tur ang ni pha lo leh hrisel lohna te, anaemia te a tlema a bo theihna tura hmalakna a nih thu a sawi.

Dr K Beichhua chuan, Poshan Abhiyan kalpui a nih tawh chinah Mizoramin an thawh ṭhat thu sawiin, tun hnai lawkah pawh national award dawngin, cheng nuai 250 dawn a nih thu a sawi a, "India ram pumah kan champion a, hei hi kan chhunzawm zel tur a ni a, hmasawn zel tur kan ni. Kan hlawhtlinna hi kan thawhpui department dangte'n ṭha taka min thawhpui vang a ni a, kan lawm hle a ni," a ti. 

SWD Minister chuan, Poshan Maah chu a pawimawh thu sawiin, "Kan ram tan a ni tih hriain theihtawp i chhuah ang u. Pathianin thluak ṭha tak leh thiamna min pekte hi mi dangte tan malsawmna atan i hmang ang u," a ti a; Poshan Maah chu ram damna tur pakhat a nih thu a sawi.

Poshan Maah hawnnaah hian kal khawmte'n theihtawp chhuah tura inpekna thutiam an chham rual a; Poshan Abhiyan-a state nodal officer Zonunpari Sailo-in Poshan Abhyian nihphung leh Poshan Maah kalpui dan tur tlangpui a sawifiah.

Poshan Abhyian hi Ministry of Women & Child Development hnuaiah kalpui niin, beihpui thlak nan Rashtriya Poshan Maah hi September thla chhung kalpui a ni dawn a; Mizoramah chuan Social Welfare department chu a bul tumtu niin, department hrang hrangin an thawhpui ang.

Poshan Maah thupui chu 'Beha­vioural change in each household' tih a ni a; chumi hnuaiah chuan thupui ṭhen têt panga - 1,000 Days Window of Opportunity te, Anemia Prevention te, Diet Diversity & Complementary Feeding tih te, Hygiene, Sanitation & Drinking Water tihte leh Diarrhoea Management-te a awm a ni.