Zirtirtu 881 lâkna la zo lo
Mizoram sorkarin muster roll (MR)-a thawk tur zirtirtu 881 lakna a kalpui mekah, Aizawl district tih loh district dang zawngah zirtirtu lakna zawh a ni tawh a, September 2019 chhungin zirtirtu lak tharte chu appointment pek tum a ni.
Vanglaini palai zawhna chhangin School Education secretary Esther Lalruatkimi chuan, Aizawl tih loh district dang zawngah zirtirtu lak an nih tawh thu a sawi a, "Aizawl district chu diltu an tam bakah, local council by-election avangin hun eng emaw chen kalpui theih a ni lo. September thla hian zirtirtu lak hna zawh vek theih kan inbeisei," a ti.
Esther Lalruatkimi hnen aṭanga thudawn danin, zirtirtu lak hna hi an thawhna district tura district thuneitute kaihhruaina hnuaiah DPAR leh Education dept.-a thawktute'n an buaipui a, zirtirtu atana an lakte chu Education Directorate-ah an thawn ang a, anni'n appointment order an pe ang.
Lunglei, Champhai, Kolasib, Serchhip leh Mamit aṭang chuan zirtirtu atana an lakte hi district thuneitute'n Education Directorate-ah an thawn tawh a, Aizawl district-in an zawhfel hunah a rualin zirtirtu atana tlingte hi tarchhuah a ni ang.
Zirtirtu lâk dan tur
District Primary School Middle School
Aizawl 170 17
Champhai 154 15
Kolasib 93 1
Serchhip 64 12
Mamit 107 6
Lunglei 226 13
Total 814 64