Mizoram leh Tahan inkara bus tlântir tum

Mizoram leh Tahan, Myanmar inkara direct bus tlântir tum chungchangah Transport department chuan sawifiahna a tichhuak a; RTI Act hmanga zawhna Transport department-in a chhannaah thil hriat sual palh a awm nia a lan thu leh, bus tlantir tum chungchang hi sorkar level-a kalpui a nih thu an tarlang.

Nimin Thawhṭannia chhuak Vanglaini-ah, RTI Act hmanga zawhna chhanna behchhanin Mizoram leh Tahan, Myanmar inkara direct bus tlàntir tum chungchangah Mizoram sorkar leh Ministry of External Affairs-te lehkhaa an la indàwr loh thu tarlan a ni a; chu chu nimin khan Directorate of Transport Department chuan a sawifiah nghal a ni.

Transport department chuan, "RTI Act hmanga zawhna Transport department, directorate level-a chhanna a niin, thil hriat sual palh a awm niin a lang a. Myanmar-a bus service tur chungchang hi sorkar level-ah kalpui niin, Minister of State, Transport department Pu TJ Lalnuntluanga chuan khatih hun laia Union External Affairs minister Sushma Swaraj hnenah hmaichhanah leh lehkha No.DO.NO.MOS-PB/L&/PAD/TRP/EF&CC/7/2018/2 dt.1.02.2019 hmang hian a lo zu dawr tawh a ni," a ti.

Minister TJ Lalnun­tluanga lehkha chu Union minister Sushma Swaraj chuan lehkha No.1141/EAM/2019 dt.12.02.2019 hmangin chhanna a thawn tih tarlangin Transport department chuan, "Champhai-Tahan (Myanmar) bus service neih ṭha a tih thu leh hemi atana thil ṭul hrang hrang, Land Custom Station upgrade-te leh thil ṭul dang­ahte hmalak nghal a nih tur thu leh, Indian Embassy, Yangon pawh a ṭul anga hma la tura hriattir nghal a nih thu a rawn sawi bawk a ni," a ti bawk.

Transport department chuan, Mizoram leh Tahan inkara bus service chungchang chu bawhzui zel a ni a, Zo fate inpawh leh zualna atan a ṭangkai dawn avangin a hlawhtlin ngei pawh beisei a nih thu an tarlang.