KHAWTHLIR

Central YMA SRS hnuaia Pharmaceutical Abuse Drugs Squad (PADS) chuan August 31, Inrinni khan medical representative pakhat hnen aṭangin Tramadol mûm 14,400 leh Cyclopam mûm 15,690 an man. SRS PADS hruaitute chuan, pharmaceutical drug an mante chu Drugs Controller hnenah an hlan ṭhin thu an sawi a, tunlai hian damdawi dan loa hralh ṭhin mi eng emaw zat an awm thu an sawi. August 31 vek khan SRS chuan Vanlalvena (33) s/o Rinsanga, Tuithiang, Aizawl hnen aṭangin heroin hawng hnih an man bawk.

Phulpui Branch YMA chuan, sangha inthlah pun hun a nih chhoh leh tâk avangin, September 1, 2019 aṭangin an khaw ram chhunga Tuirivâng luiah eng hmanraw hmang pawha sangha man phal a ni lo tih an tarlang a; sangha man lui, an man chhuahte chungah action lak zel a nih tur thu an puang.

Minister of state K Lalrinliana chuan nimin khan Kolasib-ah Kolasib College Week a hawng. Minister chuan, Kolasib College-ah science zirna a awm theih nan leh CZ Higher Secondary School, Kolasib-ah commerce zirna a awm theih nan hmalak mek a nih thu a sawi a; college-a thawkte leh zirlaite chu result ṭha nei tura ṭan la turin a fuih.

Tuichangral Zirlai Pawl (TCZP) chuan, an bial chhunga Khawlailung leh Hmunzawl inkara Tuichang luia lei (minor bridge) dawh chhe lutuk siamṭha tura sorkar an ngennain tun thlengin awmzia a la nei lo chu Tuichangral mipui zah lohnaa an ngaih thu an tarlang. Lei chu September 2019 chhung ngeia siamṭha turin sorkar an phût a, hun tiam chhunga hmalakna a awm loh chuan eng pawh thleng se TCZP-in mawh an phurh loh tur thu an puang.