CM-in Delhi a dâwr hi kan ṭhatpui - Robert Romawia

Minister of state Robert Romawia Royte chuan nimin khan Mizo Hnam Runa inkhawm­ah thu sawiin, chief minister Zoramthanga'n central sorkar a dawr ṭhin chu Mizoramin a ṭhatpui mek niin a sawi.

Robert Romawia chuan, "Central sorkar dawrnaah Chief Minister zin hian rah chhuah a nei lian ṭhin hle. Tun hnai maiah pawh khan Union Minister panga leh NITI Aayog Vice Chairman a dawrnaah ka ṭawiawm a, a tak ngeiin CM zahawm tak Pu Zoramthanga 'effective' zia ka hmu a, Central ministry hrang hrangah CM hmasa nen an intlâktlum hleihin Zoram tan an inthawh hlâwk hleih hle," a ti.

Chief Minister-in central sorkarah rawtna hraw leh ngaihdan thar a pek nasat thu sawiin Robert Romawia chuan, "Kum li lo awm tura Mizorama kawngpui siamna atana sum leh ruahmanna fel sa hi a hma kum 10 zet chhunga hnathawh aiin a lianin a ropui zawk dawn a ni," a ti a; hun kal tawha Mizoram CM-in Delhi lam a luh chhuah ngai lo nia sawiin, chu chu ramin a tuar niin a sawi.

Sports Minister chuan, tun hnaia Congress party-in thu­chhuah siam a, Khawzawl football ground chu Congress hun laia Central-in sum a sanction tawh nia an sawi chu thu dik lo niin a sawi a, "Central aṭangin dere pawh Congress hun laiin Khawzawl field tan sanction a ni lo. Tuna Khawzawl football ground siamna tur cheng nuai 700 hi CM leh Dy. CM-in Mizoram sorkar budget aṭanga an ruahman a ni," a ti.

Robert Romawia chuan, Sai­tual leh Hnahthial khelmuala phûl lem phahna tura siamṭhat hna thawh pawh NEC Guidelines siamṭhat vangin May 7, 2018 khan NEC thupekin tihtawp lailâwk a nih thu sawiin, "Rei tak tawp tawh chu sak chhunzawm a nih theih nan MNF sorkar hlim aṭangin nawr a ni a, August 21, 2019 khan Ministry of Youth Affairs & Sports chuan vetting order a tichhuak a ni," a ti a; MNF sorkarin district thar pathumah leh hmun dang eng emaw zatah football ground ṭha an siam dawn thu a sawi.