ILP nei loa lut ven dan tur sawiho

Nimin khan Mamit DC Conference Hall-ah Inner Line Permit (ILP) nei loa hnam dang Mizorama lutte zawn chhuah kawngah uluk lehzuala hmalak dan tur ngaihtuahin district bawrhsap hoin thuneitute an ṭhukhawm.

Mamit DC chuan, tun hnaia Assam-a National Register of Citizens (NRC) final list tihchhuah hnuah mi tam tak chu list-a tel lo an nih avangin foreigner anga ngaih an ni tih a sawi a; chu'ng mite chu himna zawngin Assam 

ṭhenawm state dangah an luh ngei rin a nih avangin lo invèn lâwk nan meeting koh a nih thu sawiin, "Khawtlang huapa kan ṭan rual a ṭul a, mipui hnenah a tam thei ang ber inhrilhhriatna neih a ngai a ni," a ti.

Mamit SP Shashank Jai­swal chuan, ILP nei lo, Mizoram chhunga lut tur venna kawngah Mamit district-in nasa zawka hma an lak mek thu a sawi a, Kanhmun checkgate bikah chuan CCTV dah thar a nih thu a sawi. Meeting-ah hian Mamit District Village Council Association hruaitu te, Mamit Town Joint VC hruaitu te, MZP hruaitute leh thuthar thehdarhtute an tel a; a hnuaia mi ang hian ruahmanna an siam.

1.    VC leh NGO ṭang dunin Mamit district chhunga khaw hrang hranga hnam dang awm zawng zawng hming list chhuah vek tur.

2.    Khawtlang hruaitute hriatpuina tel loin mahni in leh lo hnam dang luahtir loh tur a ni.

3.    VC leh YMA information center aṭangin mipui hnenah awareness a tam thei ber puan ni se.

4.    Police leh khawtlang hruaitute ṭangkawpin mahni veng chhung ṭheuh uluk taka vil a, hnam dang mikhualte lo thlithlai ṭhin ni se.