Swachhata Shapath Day hman a ni

School Education department bultumin nimin khan Mizo High School Field-ah faina thutiam lâkna, Swachhata Shapath Day hman a ni a, School Education secretary Esther Lalruatkimi'n a hmanpui.

Esther Lalruatkimi chuan, fai chu changkan leh changkan loh tehfung pawimawh tak a nih thu sawiin, "Kan hmelṭhat angin kan sikul, kan in leh a chhehvelte vawng fai ila, keini aia hnam upa leh changkang zawkte tih dan entawnin, mahni ringawt fai duh tâwk mai loin kawng engkimah fai tum ila, kan hriselin kan changkang sawt dawn a ni," a ti.

Faina thutiam lakna inkhawm hi School Education director Lalzarmawii'n a kaihruai a, School Education department-a thawkte leh Mizo High School-a zirlaite leh zirtirtute an tel a ni.