Administrative Reforms Committee-in Chief Minister-ah report a thehlut
Administrative Reforms Committee (ARC) chuan Mizoram House-te leh Mizoram Secretariat-a file kal dan an zirchianna report volume 1, 'Mizoram Houses & Streamlining of File Movement in Mizoram Secretariat' tih chu nimin khan chief minister Zoramthanga hnenah an thehlut.
Report-ah hian India ram khawpui - New Delhi, Kolkata, Guwahati, Shillong, Silchar, Mumbai, Bengaluru leh Vellore-a Mizoram sorkarin Mizoram House a neihte zir chian a ni a; Mumbai, Bengaluru leh Vellore tih loh chu a hmunah an enfiah vek a ni. Rawtna hrang hrang an siam a, Vellore-a Mizoram House erawh chu a enkawl hna Mizoram Presbyterian Church (Synod) kutah Mizoram sorkarin a dah avangin rawtna an siam tel lo.
Khawpui hrang hranga Mizoram House-a thawk zat te, post ṭhenkhat mi dang kuta dah (outsource) theih tur ngaihtuah te, administration te, khum leh mikhual thlen dan te, building leh choka enkawl dante an zir a; tun aia mumal zawka an kal theih dan tur te, sorkar tan zângkhai zawka kal dan tur te, tihchangtlun dan turte an rawt a ni.
Administrative Reforms Committee hian Mizoram Secretariat-a file kal dan an zir bawk a; tuna file kal mek dan chu mipui leh sorkar tan hun khawhralna tam tak a awma an hriat avangin awlsam zawk leh sorkar tana him tur si, tawi zawka file kal dan tur rawtna an siam bawk.
Mizoram sorkar chuan Administrative Reforms Committee hi May 9, 2019-ah a din a, Mizoram sorkar hnuaia department hrang hrangte zir chiang turin an tih tur bituk fel tak a siamsak. ARC hian sorkar hnathawk group C chin hnuai lam an khawih bik nia thu dawn a ni.
Administrative Reforms Committee-ah hian chairman chu Lalngheta Sailo, IPS (Rtd.) a ni a, member-te chu - Nghaklianmawia, MCS (Rtd.), Lalthansanga, MFAS (Rtd.) leh K. Vanlalrawni, MSS (Rtd.) te an ni. Secretary atan Lalrinsanga, joint secretary, DPAR (GSW) chu hman a ni bawk.