Dan loa sak Kudamte kalh leh a ni
August 20 leh 21, 2019-a Kolasib DC Zoengsanga thupeka Vairengte leh Chhimluang inkara dan loa kudam sak leh dan loa sumdawnna thil dahkhawmna atana hman thuneitute'n an kalhsakte chu, bungraw lak chhuahna hun an hawnsak a tâwp tawh avangin kalhsak an ni leh tawh.
Thu dawn danin, kudam neitute hian an bungruate an la chhuak vek a, chumi hnuah kudamte chu kalh leh a ni. Hetih lai hian, kudam kalh a nih hnuah kawngpui dungah truck lian bungraw inhlân chhâwng hmuh tur an awm zeuh zeuh a ni.
Tarlan tawh angin, Kolasib DC Zoengsanga hoin Kolasib SP Vanlalfaka Ralte, DAO J Rothanga leh sorkar official dangte'n August 20, 2019 khan Vairengte leh Chhimluang inkara dan loa sak kudamte an enfiah a; kudamahte chuan Myanmar lam aṭanga state páwna hralh tur kuhva leh phai lam aṭanga Champhai kaltlanga Myanmar lama phurh luh tur leiṭha (urea)-te dah a ni a, inthleng tawnna atana hman a ni ṭhin.
Kudamte chu dan loa sak a nih avang leh kuhva leh leiṭhate chu phalna awm loa sumdawnna atana hman a nih avangin Kolasib DC thupekin kudam paruk kalh a ni. August 21-ah pawh Vairengte SDO(C) leh Vairengte SDPO-te kaihhruaina hnuaiah kudam endik hna thawh leh a ni a, kudam pakua chu kalh leh a ni bawk.