Kolkata - Aizawl thlawhtheihna thlawkah Seat khata chuan chang a awm fo - GAD

Chief minister Zoramthanga chuan, Aizawl leh Kolkata inkara thlawhna chuan man a to bik chhan chu Lengpui Airport runway chak tâwk loh vang a nih thu leh thlawhnate'n seat full-in passenger an lak ngam loh thu, June 19, 2019 khan a lo sawi tawh a ni.

GAD Aviation Wing tarlan danin, kumin May 20 aṭanga June 20 chhung khan Kolkata leh Aizawl inkarah Air India thlawhtheihna thlâwkah seat khat ṭhapa passenger an chuan ṭum a awm nual a, passenger seat a khah (full) loh ṭum a awm bawk.

RTI Act hmangin May 20 - June 20, 2019 chhunga Kolkata leh Aizawl inkara Air India thlawhnate'n passenger an neih zat GAD-ah zawh a ni a, July 25 khan GAD Aviation Wing chuan chhanna a pe chhuak a ni. Aviation Wing chhannaa a lan danin, Air India thlawhna Aizawl/Lengpui leh Kolkata inkara direct-a thlâwkah seat awm zat (capacity) chu 144 a ni a, direct lo a, Imphal-a a ṭum hmasak erawh chuan seat capacity chu 122 a ni. GAD Aviation Wing hian Kolkata - Lengpui bik passenger zat an hria a, Kolkata-Imphal bika passenger zat an chhinchhiah loh avangin, Lengpui-Imphal-Kolkata thlawhna bika passenger zawng zawng zat an hre thei lo.

Kumin May 20-31 inkar chhung khan Kolkata aṭanga Lengpui Airport direct-ah passenger an khah ṭhap (mi 144) ní ṭum nga (May 25, 27, 28, 29 leh 30) te a awm a; direct flight bik ni dangah pawh mi 140 an tling ziah bawk.

June 1-20 inkarah erawh chuan direct flight bikah ni khat (June 4) chiah passenger full (mi 144) a awm a; a bakah chuan mi 140-143 vel a ni tlangpui a, passenger tlem zual ni-ah chuan mi 130 tlin loh ṭum a awm bawk. Kolkata aṭanga Imphal-a ṭum hmasak ṭum (via Imphal)-ah erawh chuan Kolkata-Lengpui passenger 100 an tling meuh lo thung.

June 1-20, 2019 chhung hian Aizawl-Kolkata direct flight-ah Lengpui aṭanga passenger full nghal ní vawi hnih chiah a awm a; a bakah chuan mi 140-143 a ni tlangpui a, mi 140 tlin loh ṭum ni li a awm. Aizawl-Kolkata via Imphal-ah chuan Lengpui aṭanga chuang zat mi 100 an tling ngai lo.

Mizorama Jet Airways a tàwp hnuah Lengpui Airport-a service tura sorkarin private airlines dan zawhna chhangin GAD chuan, mipui indaih lohna phuhrûk nan Mizoram sorkarin additional flight pe turin Air India a ngen tih a tarlang a, "Sorkarin a ngen angin chawlhkar khatah ni thum i.e. Thawhlehni, Nilaini leh Ningani apiangin Kolkata-Imphal-Aizawl-Imphal-Kolkata flight a rawn pêk belh a. Private airlines-ah chuan Indigo leh Spicejet te beisei a ni," a ti a; Indigo Airlines chuan October 2019-ah flight an rawn pek theih beisei a nih thu a tarlang.

GAD Aviation chuan Lengpui Airport chu Airport Authority of India (AAI) hnenah hlan tumna a awm loh thu a tarlang a, "AAI hian la pawh ni se, Airport security chu Mizoram sorkar enkawl zui a phût tlat avangin inremna a awm thei rih lo a ni," a ti.

June 19, 2019-a Vanapa Hall-a Mizoram Cooperative Apex Bank (MCAB) General Assembly a hman­puinaah CM Zoramthanga chuan, Lengpui Airport leh Kolkata inkara thlawhna chuan man chu Rs. 17,000-18,000 velte a nih thu sawiin, Kolkata-Lengpui thlawhna chuan man to bik chhan an zawh aṭanga an hriat chu - Lengpui Airport runway chu load a lak theih chin tehnaah a chak tâwk lo tih a nih thu a sawi a, "Runway khu PCN (pavement classification number) 36 chauh a ni a, a dik pangngai chu PCN 50 a ni si a. Thlawhnate'n load a full-in an la ngam lo a, chuta an lost (hloh) ai chu an la a, chuan man a sang lo thei lo ta a ni," a ti.

CM Zoramthanga hian Feb­ruary 21, 2019-a Mizoram Synod hruaitute nena an inkawmnaah, Lengpui Airport runway a ṭhat loh avangin thlawhtheihnate'n seat khata passenger an phurh ngam loh thu a lo sawi tawh bawk a, "Phurh theih chin aṭanga 80% vel chiahte an phur ṭhin a, chuvangin an hlâwk lo a ni," tiin a sawi.

GAD Aviation Wing-a principal consultant thar Wg. Cdr. J Lal­hmingliana chuan March 5, 2019-a a pisaa press mite a kawmnaah, Lengpui Airport runway chu duhthusam ni lo mah se, thlawhtheihna lian ṭumna turin a la ṭhat tâwk thu leh Airport chu thuneitute'n chei ṭhat ngai an tih loh chuan chei ṭhat kher a ṭul loh thu a lo sawi tawh bawk. "Runway ṭhat loh vang, tih hi a dik tho laiin, a dik chanve deuh a, thlawhna ṭumna tlak a ni lo, tihna a ni lo," a ti.

Aviation Principal Consultant-in press mite a lo hrilh tawh danin, Lengpui Airport hi kum 1998-ah hawn a ni a, a tirah runway pavement chak dan tehna, pavement classification number (PCN)-ah 36 a ni. Runway tichak turin NEC-in sum a pek hmangin kum 2007-2009 velah thawm ṭhat a ni a, thawm ṭhat hnuah a hmaa mi aiin ṭha zawka ngaih ni mah se, PCN zat a thara puanzar (declare) a ni lo a, chuvang chuan official-ah chuan PCN zat chu 36 a la ni. Thlawhna lian, Boeing 737-te chuan PCN 36 aia sang an mamawh.