Bairabi Zophaia mosque sak mek Titawp turin Mizoram sorkar phût

MZP General Headquarters chuan, Mizoram chhung, Bairabi Zophaiah MZP-in Zofate Chawlhbûk an sak theih loh laia Assam lamin sikul leh mosque an sa thei chu hriatthiam har an tih thu an tarlang a; Zophaia mosque sak mek chu tihtawptir vat turin Mizoram sorkar an phût.

MZP chu an dinna ngaiah an la ding reng tih sawiin MZP thuchhuah chuan, "Zofate Chawlhbûk sa turin hma kan la chhunzawm zel dawn. Zophaia Mosolman mosque sak mek hi tihtawp a nih loh chuan MZP chu Zofate Chawlhbûk sa turin a inbuatsaih leh dawn a ni," a ti.

Mizoram-Assam ramri chungchang ngaihtuah tura Mizoram sorkarin a din Core Committee chu ramri chungchang chak zawka bawhzui tura an phût thu MZP chuan an sawi a; September 6, Zirtawpni-ah Core Committee meeting a awm dawn avangin Zophaia Mosolman mosque sak mek chungchangah MZP-in hma an la la rih lo tih an tarlang bawk.

Thu dawn danin, Zophaia Mosolman-te'n mosque an sak chu Kolasib DC leh Hailakandi DC-te inbiaknaah thawk chhunzawm tawh lo tura tih ni mah se, tun thlengin sak chhunzawm zel a la ni. August 26, 2019-a Kolasib DC leh Hailakandi DC ten a hmuna an en dun lai chuan mosque ban tur iron rod-te chu tun a ni tawh a, cement, balu leh rora chhûn a la ni lo a; tunah erawh chuan a ban tura iron rod an tunah chuan cement, balu leh rora chhûn a ni tawh a, ban a din belh tawh. Mosque sak hna chu chhûnah an thawk mumal lo a, zing leh zanah an thawk ṭhin.

Tarlan tawh angin, August 26-a Kolasib DC Zoengsanga leh Hailakandi DC-te an inbiak ṭumin, Zophaia Mosolman-te'n mosque an sak mekah hna thawh chhunzawm tawh loh turin thu an dah a; Bairabi Zophaiah state pahnihin hma thar lak loh ve ve ni se, tiin thu an dah a ni.