Samagra Shiksha leh YMA-in thuthlung ziak

Samagra Shiksha, Mizoram leh Central YMA chuan Mizo­rama zirna (class I-XII)-in hma a sawn theih nan thawhhona thuthlung nimin khan  School Edu­cation Minister pisaah an ziak.

Thawhhona thuthlungah hian Samagra Shiksha aiawh­in state project director Lal­hmachhuana'n hming a ziak a, Central YMA aiawhin president Vanlalruata'n hming a ziak. School Education minister Lalchhandama Ralte chu hriatpuituah a ṭang.

School Education minister Lalchhandama Ralte chuan, zirna siamṭhat chung­chang chu YMA branch, group, sub-headquarters leh general conference thlengin an uar thu a sawi a; ram leh hnam humhalh turin zirna chu a hnuk pawimawh a nih hriain YMA-in 'Zirna uar kum' a puan tawh thu sawiin, "YMA hmalakna hi sorkar pawhin hriain, thawh dunna thuthlung ziah leh a ni ta hi a lawmawm hle a ni," tiin, YMA-te chu Mizoram hmun hrang hranga zirna kalpui dan lo ngaihven ve turin a sáwm.

CYMA president Vanlalruata chuan, ram leh hnam dinchhuahna atan zirna a pawimawh ber tih sawiin, zirna lamah tih tak zeta thawh a ṭul thu a sawi a; zirna siamṭha tura sorkar hmalakna thláwp tur leh hmun kilkhawr zawkah zirna 

ṭha a awm theih nan uar zawkin YMA-in a thawh zel dawn thu a sawi bawk.

Samagra Shiksha, Mizoram leh CYMA ten thuthlung an ziah hi kum hnih atan a ni a; zirna siamṭhatna kawng hrang hrang - naupang kum 6-14 inkar sikul lut lo dap chhuah leh sikul luhtir tura hmalakna te, naupang rualbanlo zirna lam te, naupangte'n ngaihsan tur dik an ngaihsan theihna tur leh hnam zia­ráng inzirtirna lamahte an thawkho dawn a ni.