KHAWTHLIR

Central Higher Secondary School NSS Unit chuan nimin khan an sikulah blood donation camp an huaihawt a, Aizawl Civil Hospital blood bank tan thisen unit 41 an pe a, a petute mipa 30 leh hmeichhia 11 an ni.

September 2, Thawhṭanni zan dar 8 vel khan Durtlang Leitan kawngpui pheiah bike Gixxer ABS MZ-01 R-9122, Lalnunhlua (21) s/o Rualtinkhuma, Maubawk, Aizawl khalhin H Lalnunpuii (39) d/o H Biakluna, Kolasib Diakkawn (Leitana khawsa mek) a sú a, H Lalnunpuii hi Synod Hospital-a lak a nih hnuah a hliam tuar loin a thi. Bike khalhtu hi police-in an man nghal a, a ke-ah hliam tenau a nei nia thu dawn a ni.

Nimin zing kar khan Mamit Bazar Veng V/C Hall-ah Jal Shakti Abhyian hnuaiah Special Gram Sabha (vantlang inkhawm) neih a ni. Swachh Bharat Mission hnuaia Mamit district tana ambassador Laltharzeli'n thu sawiin, ruahtui khâwlna tha neih a ṭul thu te, tuikhur enkawl fai chungchangte a sawi bakah, faina leh thianghlimna kawngah naupangte ûm phâk turin nu leh pate'n ṭan an lak a ngaih thute a sawi.

Ministry of Women & Child Development chuan naupang, mimal leh pawl, vantlang aia chungnung leh thawk ṭhate tana award a buatsaih, Bal Shakti Puraskar leh Bal Kalyan Puraskar dil theih hun a hawng a, September 30, 2019 thleng dil theih a ni. Dilna chu online-in website www.nca-wcd.nic.in ah thehluh tur a ni.

ZIDCO Employees Association chuan Chief Minister's Relief Fund-ah Rs. 50,000 an chhûng a; minister of state Dr K Beichhua'n Rs. 2,000 a chhûng lut bawk.

General Administration department chuan thuchhuah siamin, New Capital Complex panna kawngpui sirah sangha, thlai, thei leh thil dang reng reng zawrh khap a nih thu an puang.