Dan loa khaw dinte chhuak turin hriattir

Tlabung Branch YMA hruaitute chu September 1, Pathianni khan dân loa din nia hriat khaw ṭhenkhatah an kal a, tun thlenga an awmna an la chhuahsan loh avangin a rang lama chhuak turin an hriattir nawn.

Tlabung aṭanga thu dawn danin, Tlabung Branch YMA hian Tlabung chhehvel hmun hrang hranga dan loa din ni ngeia an hriat khuaa chêngte chu August 2019 ral hma ngeia ko haw vek turin anmahni awptu village council-te an hrilh tawh a; mahse, khaw per tam zawk chu hun tiam chhungin an chhuak lo. Diblibagh V/C huam chhunga khaw per pahnih - Belva leh Sazekchhuah khuaa mite erawh chu an chhuak thung.

Tlabung YMA president Zokunga Sailo chuan, dan loa khaw din chu sorkarin a phal loh, YMA pawhin an pawm loh a nih thu a sawi a; boruak ṭha lo zawk a thlen hma ngeia anmahni awptu V/C huam chhunga inbengbel vek turin an hriattir tih sawiin, "Ṭawngkaa indàwrin kan inhrilh tawh a, kan ngennain zawm a hlawh loh chuan, ram leh hnam chhan nan a ṭûl chuan eng pawh kan huam a ni," a ti.

YMA hruaitute sawi danin, Tlabung chhehvelah dân loa din ni ngeia hriat khaw 11 a awm mek a; Khojoysury V/C huam chhungah dan loa din khaw panga, Hmundo V/C huam chhungah khaw pahniha awm a, Nunsury-I V/C, Tablabagh V/C, Kalapani V/C leh Malsury V/C huam chhungah khaw pakhat ṭheuh a awm bawk.