AB-PMJAY leh MSHCS thar zirho a ni
Lawngtlai Chief Medical Officer (CMO) conference hall-ah nimin khan October 1, 2019 aṭanga hman tur Ayushman Bharat Pradhan Mantri Jan Arogya Yojana (AB-PMJAY) leh Mizoram State Health Care Scheme (MSHCS) chungchang zirhona buatsaih a ni a; medical officer Dr K Vanduhtlinga'n thil pawimawhte a sawi.
AB-PMJAY leh MSHCS-te hi October 1, 2019-ah Mizoramah hman ṭan a ni dawn. AB-PMJAY hi sorkar laipuia Rural Development ministry-in Socio Economic Caste Census (SECC) 2011 a buatsaiha khawsak harsa leh hnuaihnung a tih (deprived list-a tel) chhungkuate leh kum 2018-a Rashtriya Swasthya Bima Yojana (RSBY) hnuaia smart card neite'n an hmang thei dawn a; golden card siamin, chhungkaw pakhatin kum khatah Rs. 5,00,000 thleng damdawia inenkawlna senso an bill thei ang.
MSHCS-ah chuan AB-PMJAY hmang thei lo - below poverty line (BPL), above poverty line (APL) leh sorkar hna thawkte'n sorkara an bill sak theih loh chhungkaw member zawng zawng an inziak lut thei dawn a; chhungkaw pakhatin kum khatah damdawia inenkawlna senso Rs. 2,00,000 thleng an bill thei dawn a ni.
AB-PMJAY hnuaia golden card chu sorkar damdawi-inahte siam lâwk theih reng a ni a, damdawi-ina luh (admit) dawnah pawh siam chawp theih a ni. SECC leh 2018-a RSBY smart card nei golden card siam tawhte chuan an golden card neih sa chu kum 2021 thleng an hmang zui thei ang.
MSHCS-a inziah luh nan chuan kumin September - October chhung hun hawn a ni dawn a, inziah luh man hi BPL chhungkaw tan Rs. 100 leh APL chhungkaw tan Rs. 1,000 a ni.