Aibawkah Swachh Survekshan Grameen hawng

PHE department-a Aizawl Rural WATSAN Division leh Aibawk BDO office chuan nimin khan Aibawk BNRGSK Hall-ah Swachh Survekshan Grameen 2019 hawnna inkhawm an buatsaih a, Aibawk RD Block chhunga khaw hrang hrang hruaitute an tel.

Swachh Survekshan Grameen 2019 hawngtu Aibawk BDO Remlalliana Hnamte chuan, India ram puma faina beihpui thlak kal mek­ah leh Swachh Survekshan Grameen hmanga thing­tlang khaw tinte faina leh thianghlimna kawng­a inelnaah theih­tawp chhuah a ṭul thu a sawi a, "Fai turin balh hmasak a ngai lo a, bawlhhlawh a paihna tur dik taka paih mai hi a ni. Meizial bung leh kuhva fûnna paih danah khaw tinte uar zawkin i inzirtir leh ang u," a ti.

Swachh Survekshan Grameen hawnna­ah hian Aibawk RD Block chhunga khawtlang hruai­tute chu engtik hun pawha endik huama hma lo la tur te, chawlh­kar tin faina hnatlangpui vawi khat tal nei tur te, chawlhkar tin vawi hnih tal faina chungchang thu vantlang aurinna hmanga puang tur te, faina hna­tlanga an chêt chhuahna apiangah thla la zel turin an chah a ni.