Health Minister leh Synod hruaitute'n HIV/AIDS do dan tur an sawiho

Dr R Lalthangliana chuan, Mizote'n hnam dangin min entawn vena tur tam tak an neih thu sawiin, "HIV/AIDS lama kan chanchin erawh sawi zahthlak khawp a ni. Hetiang zel a nih chuan hnam tlém tak hi kan tlem lehzual ang a, thil pawi tak a thlen a hlauhawm. A thleng ṭan mek a ni," a ti.

Kohhran chu platform nei ṭha ber an nih avangin an pawimawh thu sawiin Health Minister chuan, "HIV/AIDS hi rilru hian a vei lo thei lo. Kan dinhmun a chhe viau tawh a, hei hi kohhranah kan inzirtir a ngai a ni," a ti a; HIV/AIDS do turin ṭan rual a ngaih thu a sawi.

Sawihonaah hian Mizoram State AIDS Control Society (MSACS) hotute'n HIV/AIDS-a Mizoram dinhmun a lem nen an sawifiah. MSACS project director Dr Lalthlengliani chuan, sorkarin a chhinchhiah dan chuan, Mizoramah HIV hrik pai mi 19,631 hmuhchhuah an ni tawh tih a sawi a, chu'ng zinga mi 11,827 (66.08%) chu mipat hmeichhiatna aṭanga kai niin, inchiuna aṭanga kai mi 5,040 (28.16%) an awm tih a sawi.

MSACS Project Director sawi danin, kum 2018-19 chhung khan chawh rualin Mizoramah HIV kai hmuh chhuah thar ni tin mi pakua aia tam an awm ang a ni a, chu'ng zingah chuan ruihhlo ngai leh nawhchizuar aiin mipui mimir pangngai an tam zawk.

Tun dinhmunah Mizoram hi India rama state zingah mihring awm zata tehin HIV hrik pai tamna ber state a ni a, kum 15 aṭanga kum 49 inkarah mi 100 zelah mi pahnih aia tam HIV hrik pai awm zel anga 

chhût a ni.

•    Mipui cheng zata tehin HIV hrikpai tamna ber state kan ni

•    Kum 2018-2019-ah nitin mi pakua aia tam HIV kai thar 

•    HIV kai tharah ruihhlo ngai leh nawhchizuar aiin mipui mimir an tam

•    HIV hrikpai hmuh thar zingah mipat hmeichhiatna aṭanga kai an tam ber

•    Kum 15 aṭanga 49 inkar mi 100 zela pahnih HIV hrikpai anga chhut a ni